‘Kuzotshalwa uR200bn kwingqalasizinda eKZN’
UNGQONGQOSHE wezokuThuthukiswa koMnotho, ezokuVakasha neMvelo KwaZuluNatal, uMnuz Sihle Zikalala, uveze ukuthi uhulumeni wesifundazwe uzosebenzisa u-R200 billion ukuthuthukisa ingqalasizinda eminyakeni eyisikhombisa ezayo.
UZikalala ongundunankulu obambile uveze lezi zindaba izolo ngesikhathi enomhlangano nabahambele ingqungquthela yeBRICS Business Council eseNkosi Albert Luthuli International Convention Centre, (ICC) eThekwini.
“Sizothuthukisa imigwaqo, izikhumulo zamabhanoyi, imizila yezitimela, ingqalasizinda yamanzi nokuthuthwa kwendle, eyokuthunyelwa kukagesi neyasolwandle. Sigqugquzela ukuthi izinkampani ezizimele zisebenzisane nohulumeni ukuze sithuthukise umnotho,” kusho uZikalala.
Ucele nabamazwe eBRICS ukuthi batshale imali KwaZulu-Natal ukuze kuthuthuke umnotho wesifundazwe.
Ubonge umphathi weSekunjalo ne-Independent Media eshicilela Isolezwe, uDkt Iqbal Survé obuye abe nguSihlalo weBRICS Business Council ngokuza kwale ngqungquthela esho ukuthi izovula amathuba omnotho.
“Sizosebenzisana namazwe eBRICS ukuqinisekisa ukuthi umnotho wethu uyathuthuka nosomabhizinisi bazuza amathuba kulobu buhlobo bamazwe afuna ukuthuthukisa iminotho yawo. Sifuna nazi ukuthi sino-oyela negas esidinga abazosebenzisana nathu kuyo. Sinesikhungo esibizwa ngeRichards Bay Industrial Development Zone lapho umuntu ofuna ukutshala imali ezothola zonke izinsiza,” kusho uZikalala.
Uthe kunesikhungo esisiza abatshalizimali ngazo zonke izidingo zabo esibizwa nge-One Stop Shop lapho befike bathole amaphepha okusebenza, okusho ukuthi abadingi ukugqigqa eminyangweni ehlukene kahulumeni. UDkt Surve uthe umnotho waseNingizimu Afrika ulinde abatshalizimali futhi nohulumeni unohlelo lokuthuthukisa umnotho olubizwa nge-Vision 2030.
Uthe iBRICS ibalulekile ekuthuthukiseni iNingizimu Afrika ngoba uma kuthuthukiswa ingqalasizinda kuvela amathuba omsebenzi okusho ukuthi abantu abaduve emakhaya bazothola amathuba.
UZikalala uthe ujabulile ngokuthulwa kweBRICS Skills Challenge ezoqinisekisa ukuthi abantu bamazwe eBRICS banamakhono adingekayo.
Ucele uDkt Surve ukuthi agqugquzele ozakwabo kwezamabhizinisi ukuthi batshale imali KwaZuluNatal bathuthukise namathuba entsha eswele umsebenzi.