Kuboshwe abebefake umuntu ebhuthini
BABANJWE bevalele umuntu ebhuthini abasolwa abayisithupha ababoshwe KwaMashu ngoLwesihlanu ababhekene namacala okushaya nokulimaza.
Akwaziwa ukuthi ubenzeni owesilisa okuthiwa ubopha ngenxa yokulimala osindiswe wukuthi amaphoyisa aseshe imoto yabasolwa.
Abasolwa abaneminyaka ephakathi kuka-20 no-35 basolwa ngokuziphindiselela kulesi sigameko. Babhekene namacala okuthumba nokushaya ngenhloso yokulimaza. Abasolwa okuthiwa baboshwe ngezithuba zawo 9.30 ekuseni kuthiwa bebehamba ngemoto iToyota Tazz esigcemeni sakwa-F KwaMashu.
Okhulumela amaphoyisa KwaZulu-Natal, uCaptain Nqobile Gwala, uthe bekukhona okusolisayo ngabasolwa.
“Kuseshwe imoto yabo ebhuthini kwatholakala owesilisa obelimele opha kakhulu. Abasolwa batholakale nesando esikhulu nezinduku okusolwa ukuthi bashaye ngazo owesilisa obesebhuthini,” kuchaza uCaptain Gwala.
Uthe owesilisa otholwe ebhuthini uphuthunyiswe esibhedlela imininingwane yakhe ayitholakalanga. Abasolwa kulindeleke bavele eNkantolo yeMantshi eNtuzuma ngaleli sonto.
Kwesinye isigameko, ngoLwesihlanu kuboshwe ababili abasolwa ngokudayisa izidakamizwa okubalwa nomshayeli weloli ethwala izimoto ezishayisile.
Abasolwa baboshwe emgwaqweni uNorth Coast eThekwini kanti kusolwa ukuthi bebesebenzisa iloli ukudayisa izidakamizwa. Amaphoyisa ophiko olulwa nobugebengu ancinzwe indlebe ngabathize ukuthi kunomshayeli odayisa izidakamizwa. Kuthiwa amaphoyisa afike endaweni yesigameko kukhona amaloli amabili athwala izimoto ezishayisile. Kutholakale izidakamizwa nomshini osetshenziswa amaphoyisa ukusesha izimpahla.
Umsolwa uboshwe nomunye abebenaye endaweni yesigameko kanti kulindeleke ukuthi bavele enkantolo maduze. Okhulumela amaphoyisa kuMasipala weTheku, uSenior Superintendent Parboo Sewpersad, uthe kushaqwe amaloli amabili kulesi sigameko. Uthe enye kutholakale ukuthi ibivele ingenalo igunya lokusebenza.
“Sizosebenza kanzima ukubuyisela iTheku endaweni yalo, ngeke sivume ukuthi liphathwe yizigebengu,” kusho uSewpersad.
UCaptain Gwala uthe omunye umsolwa oneminyaka engu-27 oboshiwe utholwe nensangu. Kulindeleke ukuthi avele eNkantolo yeMantshi eThekwini namuhla.