Usale nakumbethe kusha umjondolo
USATHUKILE umfundi (21) waseMlazA kwa-G osinde kukubi kusha indlu abelele kuyo emlilweni omshiye ephuma nabekugqokile.
UNdumiso Jeza owenza uGrade 12 uthe namanje akakholwa ukuthi usinde kanjani ngesikhathi kusha umlilo elele emjondolo wakhe ahlala kuwo ongaphandle kwakubo ezintatha zangoLwesihlanu.
Uthe uvuswe yintuthu ebigcwele indlu, wazama ukuphuma ngoba ubesawubona umnyango.
Uthe kuthe uma ezama ukubuyela phakathi eyolanda izimpahla zakhe wanyathela upulasitiki washa onyaweni nasengalweni futhi wahluleka ukukhipha izimpahla zakhe nezikamfowabo abahlala naye kuleya ndlu.
“Angazi ukuthi yini eqale umlilo ngoba ngilale ngicishe ugesi futhi bengingasebenzisi ikhandlela. Okungiphatha kabi ukuthi njengoba kushile ngishelwe yiyo yonke into. Izimpahla zami zesikole, izincwadi nazo zonke izinto. Ngiphume nezinto ebengizigqoke ngesikhathi ngilele nje kuphela,” kuchaza uNdumiso.
Unina omncane kaNdumiso, uNksz Ntombifuthi Jeza (34) osenakekele uNdumiso kusukela ashonelwa ngunina, uthe lesi sigameko sibathwalise kanzima njengoba naye engasebenzi.
Uthe ufisa engathi bangathola usizo ikakhulu njengoba bobabili labo abashelwe befunda. UNksz Jeza uthe ngaphandle kwezimpahla zikaNdumiso kushe nezimpahla zikamfowabo naye owenza umatric nezodadewabo omunye owenza uGrade 10 nowenza uGrade-11.
“Yena nomfowabo bahlala ndawonye kuleya ndlu. Ngenhlanhla lona omunye akalimalanga ngoba ubengekho endlini ngesikhathi kusha kodwa naye ushelwe yiyo yonke into abenayo.” kusho uNksz Jeza.
Uthe sebelinde ukuthola noma yiluphi usizo ikakhulu usizo olungaba ngolwezimpahla zesikole nezimpahla zokugqoka.