Bathuka izanya abe-Uber neTaxify
SEBEHAMBELA kude neChesterville abashayeli bezimoto ezincane ezithutha abantu zeTaxify ne-Uber.
Lokhu kulandela ukungqongiswa kwemoto yakwaTaxify emgwaqweni uMahlathi, eChesterville, ngoLwesihlanu ebusuku.
Kuthiwa lo mshayeli ongowakhona eChesterville usathuka izanya ngemuva kokubona imoto yomqashi wakhe isha iba ngumlotha phambi kwakhe.
Ngokusho komthombo, lo mshayeli uthole isicelo efonini sabantu abathe bakulo mgwaqo lapho ekushiswe khona imoto ngo-8 ebusuku.
“Laba bantu bazenze amakhasimende kanti bayamlutha. Uthe efika khona wavinjwa imoto iToyota Corolla emhlophe ebihamba amadoda amathathu. Amkhiphe emotweni maqede ayibhunyela ngophethroli ebuka. Ngenhlanhla yena abazange bamenze lutho,” kusho umthombo.
Uthe lo mshayeli bamshiye evevezela njengoba bakubeke kwacaca ukuthi ngokuzayo ngeke asinde.
Imizamo yokuthola ukuphawula kwalo mshayeli ayizange iphumelele, ucele ukungaphawuli, ukuvikela ukuphepha kwakhe nomndeni wakhe.
Kunezinsolo zokuthi uhlaselwe ngosomatekisi bakhona eChesterville ngemuva kokuthi ngoLwesihlanu olwedlule osomatekisi bososheshini abahlukene eThekwini okubalwa nowaseChesterville “bethumbe” abashayeli bakwaTaxify no-Uber nezimoto zabo.
Labo somatekisi kuthiwa babasabisa laba bashayeli babafuna uR5 000 ukukhulula imoto ngayinye.
Omunye umshayeli weTaxify obeveva ngemuva kokuzwa ngalesi sigameko uthe ngesikhathi bevinjezelwe enkundleni yezemidlalo ngeledlule, osomatekisi basabisa ngokuzishisa lezi zimoto abasebenza ngazo.
“Siyesaba ngoba sebenza le nto ababeyisho ukuthi bazozishisa izimoto. Asazi ukuthi kungani besilwisa ngoba sisebenza ngokusemthethweni. Sinxusa uhulumeni usilekelele ungenelele ngoba kuyacaca ukuthi balwa nathi.
“Inkinga ukuthi kukhona abanye babo abanazo izimoto zakwa-Uber noTaxify. Uma sebesihlasela bazihlalisa emakhaya izimoto zabo,” kusho lo mshayeli.
Uthe ngoMsombuluko (namhlanje) bazohambela isiteshi samaphoyisa aseCato Manor ukuyonxusa umphathi siteshi waso ukuthi aqikelele ukuphepha kwabo uma besebenzela eChesterville.
“NgoLwesine kukhona nezimoto ezivinjwe emgwaqweni uFlorida, eMorningside. Ngakho akukho lapho engathi siphephile khona. Siyesaba ngoba sithwala abantu. Bakhala ngokuthi asinazo izincwadi ezisigunyazayo ukusebenza kodwa akusikho okwabo lokho. UMnyango wezokuThutha okumele usitshele lokho,” kusho lo mshayeli othe yena usamile ukusebenza.
Usihlalo kasoseshini waseChesterville, uMnuz Mbongeni Mkhize, uthe uzwile ngesigameko kodwa bayaziqhelelanisa naso.
“Yingakho sasithi kumele isheshe ilungiswe le nto kungaze kungenelele nabantu abanodlame. Thina besisazama ukuyilungisa ngomlomo. Baningi abantu abangeneme ngokusebenza kwezimoto ze-Uber nezeTaxify, manje sebecasha ngathi,” kusho uMkhize.
Okhulumela amaphoyisa KwaZulu-Natal, uCaptain Nqobile Gwala, uthe amaphoyisa aseCato Manor aphenya icala lokucekela phansi impahla ngemuva kokushiswa kwemoto.
“Akukaboshwa muntu , uphenyo lwamaphoyisa lusaqhubeka,” kusho uGwala.