Omunye umnikelo eMariannpark
INGENA ingenile iminikelo esikoleni samabanga aphansi eMariannhill, ngesonto eledlule esithole amakhompyutha amasha kwalungiswa negumbi lawo.
Umnikelo obiza uR200 000 unikelwe yiZandile Gumede Foundation eyasungulwa yiMeya yeTheku eMariannpark Primary. Umnikelo oxhaswe yiYOA Cables, uhambisana nemigubho yokukhumbula uDkt Nelson Mandela.
Uthishanhloko wesikole uMnuz Lucky Nkosi uthe bathole amakhompyutha amasha angu-30, kwaphinde kwalungiswa kabusha iComputer Laboratory. Uthe amakhompyutha abanikelelwe wona azofakwa neWi-fi.
Ngenyanga edlule isikole sinikelelwe ngegumbi lezesayensi yinkampani iSmiths Manufacturing. Kube yisona sokuqala lesi sikole ukunikelelwa ngalolu hlobo lwegumbi lesayensi, oluzosiza abafundi ngezifundo zabo.
Lesi sikole iSolezwe eselike labhala ngaso engosini yezezikole, sihlangenise umphakathi oxube nabokufika. Yisona kuphela isikole esifundisa ngesiNgisi kule ndawo egcwele nezindlu zemixhaso. UNkosi uthe bagcina ngo-2015 ukuthola amakhompyutha ashesha afa ngoba ayengemasha.
Uthe bebewadinga amakhompyutha ngoba asedingeka kakhulu esikhathini semfundo yamanje.
Uveze ukuthi amakhompyutha afakwe izinsiza zezifundo okubalwa iMaths neSayensi, okuzothuthukisa izifundo zabo.
“Kuyintokozo ukuthi kusukela kwaGrade 3 abafundi sebezoba nothisha ozofundisa ikhompyutha. Kubalulekile ukuthi abafundi bafundiswe besebancane ukwazi ngobuchwepheshe ngoba sekusebenza bona kakhulu.
Isikole sethu sinabazali abangekho esimeni esihle kwezezimali njengoba kungakhokhwa. Kunabazali abebengakwazi ukusebenzisa amakhompytha, asebezosizwa yizingane zabo ngolwazi eziluthole esikoleni,” kuchaza uNkosi.
Ngesikhathi iphephandaba libhala ngalesi sikole engosini yezezikole, sasinikelelwe ngamagumbi okufundela angomahamba nendlwana njengoba kuthiwa sikhulu kakhulu isibalo sabafundi.
UMnuz Wiseman Mkhize okhulumela iZandile Gumede Foundation ubonge iYAO Cables ngokuba yingxenye yalo mnikelo. Uthe imeya ikukhathalele ukuthuthukisa imfundo yezingane zabamnyama, yingakho ibe yingxenye yalo mnikelo.