Umkhosi ohlatshwa yiDA koluthinta intela

I-DA icela abantu baseNingizimu Afrika ukuthi baseke umkhankaso wayo wokuthi kwehliswe intela obizwa nge#StopTheTaxAttack ukuze uhulumeni eze namaqhinga okwehlisa izindleko zokuphila.

Esitatimendeni uMnuz Solly Malatsi, okhulumela iDA kuzwelonke, uthe ngo-Agasti abantu bazokhokha u-33% owengeziwe uma begcwalisa izimoto zabo.

Wenze isibonelo sokuthi uma ugcwalisa imoto ngoAgasti u-33%, okuwuR265, uzoya kuhulumeni ngenxa yentela ekhokhwayo kuphethroli.

Uthe abagibela amatekisi bazokhokha uR300 owengeziwe emalini yabo yokugibela.

“Abantu bathwele kanzima ngoba izindleko zokuphila ziphezulu. Siyabacela ukuthi basayine incwadi yethu yokucela uhulumeni ukuthi ehlise intela ayibeke emahlombe ethu. Unyuse intela ekhokhwa uma uthenge izimpahla, kwanyuka intela ekhokhwa ngabasebenzayo, ekhokhwa ngamaxhwele nabaphuzayo, ekashukela kanjalo nekaphethroli eningi eya enhlanganweni esiza abalimele ezingozini zomgwaqo,” kusho uMalatsi.

Uthe uhulumeni kufanele ehlise intela kaphethroli ngo-20% futhi ayibuyisele ku-14% intela ekhokhwa uma uthenge izimpahla.

Uphethe ngokuthi incwadi yabo itholakala kwiwebsite yeDA.

Khonamanjalo kunyuke imali yokugibela amatekisi neyamabhasi kaMasipala weTheku iDurban Transport.

AbeDurban Transport bathe bekufanele banyuse imali yokugibela ngenxa yezindleko zokuphatha amabhasi.

Baveze ukuthi ngenyanga basebenzisa amalitha angu1.3 million kaphethroli kanti uma unyuka ngoR2 ilitha kusho ukuthi bazokhokha uR2.6 million ngenyanga.

Baphinde baveza ukuthi nokunyuswa kwamaholo ngo-10% kwenze banyusa imali yokugibela ngoba kusho ukuphuma komunye uR2 million esikhwameni sabo.