Asethembe ukuthi i-ANC isizogxila kokudingwa abantu
NGOMGQIBELO ingqungquthela ye-ANC KwaZulu-Natal iphothuliwe kwakhethwa ubuholi obusha okubonakala sengathi bamukelwa yiwona wonke umuntu.
UKhongolose usazoholwa uMnuz Sihle Zikalala ophinde waqokwa njengosihlalo, iphini lakhe kwaba nguMnuz Mike Mabuyakhulu.
UZikalala wayekade vele engusihlalo emuva kwengqungquthela yango-2015 ngaphambi kokuthi inkantolo iyichithe imiphumela yokhetho.
Uqhekeko kwi-ANC lwandile ngesikhathi kubhekwe engqungqutheleni yokukhetha ubuholi bukazwelonke eNasrec, eGoli, nyakenye. UZikalala wayehamba nababeseka uDkt Nkosazana Dlamini Zuma bese kuthi uMabuyakhulu aseke uMengameli Cyril Ramaphosa.
Emva kokuqokwa okokuqala kwabakhona ongqongqoshe abaxoshwayo ezikhundleni zabo. Omunye wabo kwaba nguMabuyakhulu.
Nakuba kube nezihibe kancane ngaphambi kokuthi kuqalwe ngoLwesine ngenxa yamalungu aye enkantolo eyozama ukumisa ingqungquthela, kodwa angaphumelela, lilonke ihambe kahle.
Ukuphumelela kwengqungquthela kusho ukuthi i-ANC igcine isitholile isisombululo ezinkingeni ebeziyihlukanise phakathi.
Nakuba kungeke kwashiwo ukuthi sekuphelile nya ukungaboni ngaso linye kodwa igxathu inhlangano elithathile libalulekile futhi lizoyiyisa phambili. Kuyancomeka nokuthi uMengameli Ramaphosa wethule inkulumo ngaphandle kokuphazanyiswa.
Njengoba i-ANC kuyiyo inhlangango ebusayo kumqoka ukuthi ihlukane nokugxila ezimpini zangaphakathi ngoba lokho kuphazamisa umsebenzi kahulumeni ogcina ungasenzekanga kahle ngoba abantu balibala wukuklwebhana bagcine bengasasebenzi.
Okunye obekukubi ngoqhekeko wukuthi bekuholela nasekutheni amanye amalungu agcine ebulalana ngenxa yokungaboni ngasolinye kwabaholi.
Asethembe ukuthi kusukela manje bazogxila emsebenzini wokuhambisa izidingo kubantu hhayi ukulwa.