Aze ayinkinga amaphara eNquthu
MHLELI: Ngoba isiphekiwe sengithi mangiyiphule ngiyihlukanise ngezithebe mayelana nodaba oluphakanyiswe ngokubanjwa kwabantu eNquthu obelushicilelwe ephephandabeni lomhla ka-13.
Yiqiniso elingephikwe lelo, sengikubone izikhawu kwenzeka phambi kwami kuyilapho ngingeke ngenze lutho. Bayabulala laba bafana abadlali. Imbangela yakho konke lokhu wukuchanasa kwabashushumbisi bezidakamizwa ezidayisa udede kuleli dolobha.
Ngikusho lokhu ngoba umphakathi namaphoyisa uyabazi laba bantu abashushumbisayo kodwa abathathelwa zinyathelo ngoba wobhululu babo. Okungamaphoyisa bayakucubuzelela. Thina njengomphakathi kasiphephile. Angiphathi uma sekuhwalele kumele wazi ukuthi ungahle ungafiki nasekhaya.
Uma ushayisa sekuhlwile kumele uqinisekise ukuthi uthola into ezokubeka ekhaya. Kuke kwatholakala izidumbu ezine zababulawa ngobusuku obubodwa.
Ingalo yomthetho kuleli imfishane kakhulu. Lokhu ngikusho ngoba ziningi izigameko zokubulawa kwabantu kodwa kuthuleke kube sengathi akwenzekanga lutho.
Amabhubesi uma engaboshwa afuyelwe ukuba asidle asiqede. Kwala noma umphakathi usibambile isigebengu usiyise emaphoyiseni unele ungahamba sidedelwe usibone sesibhampa sinilandela sinichomela ngoba sesidedelwe. Sesiyoqhubeka la sigcine khona.
Kwesinye isikhathi umphakathi uwaluma indlebe amaphoyisa baboshwe abenzi bokubi maqede inkantolo ibakhiphe ithi abukho ubufakazi . Ngicela ukuba kujutshwe ithimba elizonqanda ukubhebhetheka kwamaphara adlangile eNquthu.
Okhathazekile ENQUTHU