Kutholwe amaqakelo angombombayi
KUTHOLAKALE amabhokisi angaphezu kuka-500 amaqakelo angombombayi ngesikhathi amaphoyisa egasela endaweni egcina impahla eThekwini.
Amaphoyisa abeholwa wuphiko oluphenya ngobugebengu obuhleliwe esifundazweni, iProvincial Organised Crime Unit, alunywe indlebe ngabantu abasabalalisa amaqakelo angombombayi ohlobo lwama-Always Ultra.
Indawo egcina izimpahla obekugcinwe kuyo amaqakelo kuthiwa iku-Victoria Street (Bertha Mkhize).
Umthombo ongaphakathi emaphoyiseni uthe uphenyo ngamaqakelo luveze ukuthi anegciwane elingadala izinkinga empilweni yabawasebenzisayo.
Okhulumela amaphoyisa, uCaptain Nqobile Gwala, ukuqinisekisile ukuthi kuboshwe indoda (39) yase-Ethiopia.
“Singakuqinisekisa ukuthi umsolwa uboshelwe kuVictoria Street emuva kokuthi etholakale namabhokisi awu-509 amaqakelo angombombayi. Kuphinde kwatholakala namabhokisi amareza nawo athathiwe,” kusho uCaptain Gwala.
Uthe umsolwa ubekwe icala lokutholakala nempahla engekho emthethweni.
UMnuz Ayotomiwa Ajewole, okhulumela iProcter and Gamble ekhiqiza amaqakelo ohlobo lwamaAlways Ultra eNingizimu Afrika, uthe inkampani iyazi ngokuthi kunabantu abadayisa amaqakelo ngokungekho emthethweni.
“Silandela imigomo ebucayi ukuze siqikelele ukuthi amaqakelo ethu ayahambisana nemigomo yezempilo ngakho angikwazi ukuphawula ngomthelela amaqakelo angombombayi angaba nawo,” kusho u-Ajewole.
Umengameli weSA Society for Obstetricians and Gynaecologists, UDkt Greta Dreyer, uthe amaqakelo angayingozi uma kungukuthi anegciwane thizeni.
Uthe ngaphandle kwalokho athathwa njengomkhiqizo ongeyona ingozi kangako.
Khonamanjalo, ngoMeyi kutholakale izinkulungwane zamaqakelo angombombayi eMpumalanga. Kwaboshwa abantu abawu-14 bangaphandle okwakukhona kubo abawu-12 baseMalawi nabawu-2 baseChina.