Ingaphinde idlale owamanqamu iCrusaders ne-Emirates Airlines Lions
KUNGASE kwenzeke okungakaze kwenzeke emlandweni weVodacom Super Rugby kusukela yasungulwa ukuthi amaqembu adlale owamanqamu ngesizini edlule kube yiwo futhi abhekana emdlalweni ofanayo ngesizini elandelayo.
Imiphumela yangempelasonto yokuqala yemidlalo yemikhumulajezi ingase ihlanganise iCanterbury Crusaders ne-Emirates Airlines Lions kowamanqamu. Emidlalweni eyandulela eyamanqamu iLions ithishwe ukuthi inqobe kwiNSW Waratahs eGoli kanti neCrusaders iyona okubhekwe ukuthi inqobe kwiHurricanes kozoba seChristchurch.
Uma konke kuhamba ngendlela okubukeka kuzohamba ngayo, iCrusaders iyona ezobe ikowamanqamu ngo-Agasti 4 kanti izobe ibhekene neqembu okuyilona ebibhekene nalo kowamanqamu ngonyaka odlule e-Ellis Park, eGoli.
Ukubhekana kwamaqembu afanayo kowamanqamu iminyaka ilandelana kwagcina ukwenzeka ngo-1993 ngesikhathi umqhudelwano uqala amaqembu eseyishumi (Super 10).
Yize intando yabaningi ikhomba ukuthi kufanele kube yiCrusaders neLions kowamanqamu, la maqembu asamelwe wumqansa wokunqoba kwiHurricanes neWaratahs ngokwahlukana. ICrusaders inenebule iCell C Sharks ngo 40-10 ngoMgqibelo kwase kuthi iLions yenza okufanayo kwiJaguares iyithela ngenduku ka 40-23.
Ukufinyelela kweyandalulela eyamanqamu kulandelana kweLions kwenza abathandi bombhoxo bakhulelwe yithemba ngokuthi asisezukuba side isikhathi belindile ukubona leli qembu liqukula le ndebe. Kungakuhle kakhulu lokhu uma iHurricanes ingase inqobe kwiCrusaders ngoba kuyobe kusho ukuthi amaLions azowudlalela ekhaya owamanqamu.
ICrusaders ibiqine kakhulu kunamanye amaqembu kulo mqhudelwano kodwa iHurricanes iyona kuphela engakwazi ukwehlula ompetha uma ubheka indlela esiqine ngayo isikimu sayo (iHurricanes). Akubaphethe kahle abasondelene nombhoxo ukuthi kuseyiVodacom Bulls kuphela iqembu laseNingizimu Afrika eselike ladla lesi sicoco.
Isiyonke imiphumela yama-quarter final ihambe kanje: Emirates Airlines Lions 40-23 Jaguares; NSW Waratahs 30-23 Highlanders; Crusaders 40-10 Cell C Sharks; Hurricanes 32-31 Chiefs.