AbaseKZN bazama itoho kwi-Eagles
BAXOXA neRoyal Eagles abadlali abathathu baKwaZulu-Natal asebezakhele igama emaqenjini adlala kwi-Absa Premiership obekungacaci ngekusasa labo kulandela ukuchithwa ngamaqembu abo.
UMbongeni Mzimela, obengunozinti wePlatinum Stars, Siphiwe Mtsweni ovela kuMaZulu FC noNkosinathi Mthiyane ochithwe yi-Orlando Pirates, kuthiwa sekusele kancane ziphothulwe izingxoxo zabo ne-Eagles njengoba bebonakale kweminye yemicimbi ephethwe yizikhulu zaleli qembu izolo.
Ngokusho komthombo waleli phephandaba osondolene nalaba badlali, sekungaba wumlingo kuphela ongavimba ukusayiniswa kwabo.
“Kuthiwa uMthiyane noMzimela baxoxa ngemali kanti uMtsweni kusamele akhululwe ngaMaZulu,” kusho umthombo izolo ntambama.
Khonamanjalo, i-USSA ikhale yemuka nesicoco se-Under 21 SAB National Championship ishaya iMpumalanga ngo 2-1 kowamanqamu eKing Zwelithini Stadium, eMlaza, izolo ntambama.
Amagoli e-USSA avalelwe phakathi nguThabang Chuene obe ngumdlali wosuku noKavendree Makhene, kwathi elokubika kwiMpumalanga lashaywa nguKhulekani Masemola. Wonke amagoli angene ngesiwombe sesibili.
I-USSA ihlabane ngesheke lika-R20 000 ngokunqoba lo mqhudelwano. Leli qembu elicijwa nguGodfrey Tenoff bese lidlala kowamanqamu okwesine kulo mqhudelwano ngemuva kokuwunqoba ngo-2011 nango-2016. Ngonyaka odlule lilale isithathu.
IMpumalanga ilale isibili ngo-2013 nango-2015, yalala isithathu ngonyaka owedlule.
IKwaZulu-Natal ayikaze iwunqobe lo mqhudelwano selokhu wasungulwa ngonyaka ka-2000. Kulokhu iphume emidlalweni yamaqoqo.
IGauteng iphume isithathu ngemuva kokushaya iLimpopo ngo 7-1 kowomthobanhliziyo. Imidlalo ibiqale ngoLwesibili njengoba ize yasongwa izolo ngowamanqamu.