Usalinde imvume yokusebenza uSolinas
AKAKAWUQALI umsebenzi umqeqeshi omusha weKaizer Chiefs, uGiovanni Solinas, onengcindezi yokubuyisa izinsuku zenjabulo eNaturena.
Nakuba sekuphele isonto iChiefs imemezele uSolinas njengomqeqeshi omusha kodwa kuvele ukuthi kuze kube yimanje akakaqali ukupheka iqembu. IChiefs ihlulwe yiMamelodi Sundowns ngo 2-1 emdlalweni weShell Helix Ultra Cup eFNB Stadium, eNasrec, ngoMgqibelo ntambama.
Amagoli eSundowns ashaywe nguJeremy Brockie noThemba Zwane. EleChiefs lishaywe nguBernard Parker.
Ngesonto eledlule abadlali beChiefs bebekhuluma ngendlela uSolinas, osalinde imvume yokusebenza eMzansi, abachazele ngayo ukuthi ufuna badlale kanjani. Izintambo zokuqeqesha iChiefs zisabanjiswe uPatrick Mabedi ovale isizini esehlezi ebhentshini kulandela ukusula kukaSteve Komphela.
Emuva komdlalo weSundowns, uMabedi uveze ukuthi alukho ulwazi uSolinas asaludlulisele kubadlali.
“Kusukela esijoyine ekhempini, wethulwa kubadlali, akakaqali ukuqeqesha iqembu. Okwamanje usabuka nje. Kujwayelekile ukuthi uma umqeqeshi efika aqale abuke okwenzekayo. Siyaxhumana naye, asho lokho afuna ukukusho, aqhubeke abukele,” kusho uMabedi.
Mayelana nokuhlulwa yiSundowns uthe: “Kuhle ukuba nezinselelo kusaqalwa. Abadlali benze kahle kodwa kunzima uma udlala neqembu elifana neSundowns ngoba wenza amaphutha ujeziswe.”
IChiefs idlalise isikimu esijwayelekile kodwa sithwale kanzima kwiSundowns eqale umdlalo ngabadlali abangajwayele ukudlala okukhona kubona u-Anthony Laffor, Kennedy Mwenee, Lucky Mohomi nabanye.
“ISundowns isinikeze umdlalo omuhle futhi ibikade iyiqembu elingcono osukwini. Lo mdlalo usinike ithuba lokubona izindawo okufanele sisebenze kuzona. Siwatholile amathuba kodwa sahluleka ukuwasebenzisa. ISundowns ibivele idlala njengoba isidlala nemiqhudelwano emikhulu. Kodwa-ke kuhle ukuhlulwa manje bese wakha okuthize okubheka phambili,” kusho uMabedi.
Lo mqeqeshi uphinde wadalula ukuthi basafuna umdlali wasemuva kwesokunxele. Kusabalele izinkulumo zokuthi sezikuvuthondaba izingxoxo noMusa Lebusa ongukaputeni we-Ajax Cape Town okuthiwa imbanga neSundowns.