Angingeni kwezemali, kusho uKomphela
UMQEQESHI weBloemfontein Celtic, uSteve “Mphathi” Komphela, uthi azimxaki izinkinga zemali ezikhungethe iqembu njengoba kuke kwateleka nabadlali ngenxa yokungaholi.
UKomphela ujoyine iCeltic njengoba kuvalwe isizini ngemuva kokuhlala amasizini amathathu kwiKaizer Chiefs. Ubekhuluma nabezindaba eGreyville eThekwini lapho ebeluleka abadlali abebehlanganyele kwiSAB Under 21 National Championships.
“Leyo ndaba yihhovisi elibhekene nayo. Kunezinto ongeke ukwazi ukwenza lutho ngazo njengomqeqeshi. Okwami ukuqeqesha bese bona bebhekana nakho lokhu okunye,” kusho uKomphela.
Mayelana nokuza eqenjini elinezinkinga, uthe: “Ngihlezi ngisho ukuthi ngeke ufune umuntu ozoqhamuka nesisombululo uma ingekho inkinga. Uma kukhona umqeqeshi ohambayo kumele kube khona ofikayo. Bayadingeka abaqeqeshi.”
Inhloso yakhe enkulu kwiCeltic wukuthi akhe uzinzo kodwa futhi uyakuqonda nokubaluleka kwemiphumela.
Uthe umatasa namalungiselelo okuqala kwesizini lapho ezobhekana khona neChippa United emdlalweni wokuvula. NgokwePremier Soccer League (PSL) kulindeleke ukuthi isizini ka-2018/2019 iqale ngo-Agasti 4.
Nokho kusasa i-Ajax Cape Town izonikela eNkantolo eNkulu yaseGauteng iyofaka amaphepha okumisa ukuqala kweligi.
Udaba lumayelana noTendai Ndoro eyamdlalisa yize ayesegijime kwamanye amaqembu amabili ngesizini edlule.
I-Ajax yalahlwa ngecala umehluleli weSafa, uWilliam Mokhari, kodwa yaluyisa enkantolo udaba yafike yayivuna ngokuthi kumele ibuyiselwe endaweni ka-15. Kodwa iPSL ikushaye indiva lokho imemezela ukuqala kweligi ngenyanga ezayo.
Ebuzwa ngalo mdonsiwano uKomphela uthe: “Angiyazi kahle ingqikithi yawo kodwa ngiyakholwa wukuthi sineziphathimandla ezifanele zizokwazi ukubhekana nayo. Iligi izoqala maduze ngoba okwamanje akukho okubheke eceleni esisakuzwile ngakho siyaqhubeka namalungiselelo njengokujwayelekile.”