UJele akakadeli izindebe kwiBucs
USAFUNA ukuwina ezinye izindebe kwi-Orlando Pirates uHappy Jele, ukaputeni wayo othole umklomelo iChairman’s Award ngesonto eledlule.
IPirates kade inomcimbi wokuklomelisa abadlali ngoLwesine olwedlule emuva kweminyaka wagcina ukuba khona. Ubusuku buphenduke obukaMusa Nyatama othole imiklomelo emithathu okuyiPlayer of The Season, Players’ Player of The Season neFans’ Player of The Season.
UJele, osehlale isikhathi eside kunabo bonke abadlali abakhona kwiPirates, usekubone konke. Ubekhona ngesikhathi eZimnyama ziwola izindebe eziyisithupha kumasizini amabili. Waphinda wakhala nayo ngesikhathi ihluleka ukungena kwiMTN8 ngesizini ka-2016/2017.
UJele uyakwazi ukuphoxeka behlulwa kowamanqamu weCAF Confederation Cup.
“Ngeke ngisho ukuthi sengizophanyeka amakhokho emgibeni. Ngisafuna ukudlala ibhola. Ngisafuna ukuwinela iqembu izindebe eziningi ngoba linginakekele ezikhathini ezinzima, langisiza kakhulu. Ngibona ukuthi likufanele ukuwina ezinye izindebe ngisadlala,” kusho uJele.
“Kuningi okungigqugquzelayo ukuthi ngiqhubeke nokudlala ibhola. Izifundo engizitholayo usuku nosuku uma siziqeqesha ziyangigqugquzela. Ngingasho ukuthi eminyakeni edlule mhlawumbe bengingaliboni ibhola ngendlela ibhola eliyiyona manje. Sengilibona ngendlela ehlukile. Ngicabanga ukuthi yilokho okungenza ngiqhubeke nalo.”
UJele uyena kuphela umdlali owayekhona ngesikhathi umqeqeshi uMilutin “Micho” Sredojevic efika okokuqala kwiPirates. UMicho ubuyele kwiPirates ekuqaleni kwesizini ka-2017/2018 noRulani Mokwena, yashukuma.
EZimnyama ziqede isizini endaweni yesibili kwi-log ye-Absa Premiership emuva kompetha iMamelodi Sundowns. Zizohambisana namaBrazilians emqhudelwaneni iCAF Champions League. Lona umqhudelwano asho efika
uMicho ukuthi ufuna iPirates ihlale idlala kuwona.
“Ngicabanga ukuthi mkhulu umehluko kuMicho wamanje nalona wasekuqaleni. Kuthiwa ngokuhamba kweminyaka nomuntu uyakhula. Naye ukhulile ebholeni. Ziningi izinto asifundisa zona. Yena benoRulani benza umsebenzi oncomekayo eqenjini,” kusho uJele.
“Kuyisibusiso kimina ukudlalela iqembu elikhulu. Ngihlale ngizitshela ukuthi nginenhlanhla ukudlalela iPirates iminyaka ewu-12. Kuyinto enkulu kimina.”
UJele, oneminyaka ewu-31, alikho elinye iqembu aseke walidlalela ezingeni elikhokhelayo ngaphandle kwePirates.
Ufike kuyona ngo-2006 nokuchaza ukuthi sekuphele iminyaka ewu-11 eyibambe kweZimnyama. Njengamanje uyena ogqoka ibhande likakaputeni.
UThabo Matlaba, oke waba ngukaputeni kwiBucs, ukhonjwa kwiChippa United lapho kuthiwa uzoya khona noThamsanqa Sangweni benoBernard Morrison.