Izindaba eseziphoxa iDundee July
SEKUMISWE ukukhokhelwa kwabanqobe esigabeni esikhulu somjaho wamahhashi iDundee July obungoMgqibelo, eDundee.
Lokhu kulandela isikhalo esifakwe ngomunye wabanikazi behhashi elichithwe ukuba ligijime kulo mjaho ngoba lisolwa ngokuphula imigomo elandelwayo uma kunalo mjaho.
Abanikazi bakaMinister wasoGwini basonge ngokumangalela iDundee July ngoba besola esinye sezikhulu zalo mjaho ngokuthi besivele sinenzondo, singalifuni ihhashi labo. Kulo mjaho kunqobe uSichomane, naye oyihhashi lasoGwini omuke nesiteki sika-R100 000.
UNkk Thandi Sima nomndeni wakhe bebevutha besola uMnuz Mdubane Gama ngokuba nesandla ekuchithweni kwehhashi labo ukuba liqhubeke nomjaho.
“Uqale wasitshela ukuthi ihhashi lethu alikwazi ukuba yingxenye yalo mjaho ngoba liwuhlobo lwePure Breed, okungamahhashi agijima ngokweqile. Kuthe uma selingenile kulo mjaho lakhishwa seligijima kwathiwa liyaholobha esikhundleni sokutelebhela. Bebeliqambela ngoba thina besililandela ngesikhathi ligijima belitelebhela njengawo wonke. Kwale ngisho sithi abasikhombise i-video ukuze sibone kodwa benqaba. Ngisho uJoe Hudla ngesikhathi esakaza uphelelwe amazwi ngoba kungasaqondakali ukuthi kwenzekeni ngoMinister. Mina ngiwummeli, umthetho ngiyawazi yikho sizobabopha futhi sifuna kuqokwe umxazululi ozimele alungise lolu daba. Siphatheke kabi kangangokuthi ngisho uJockey uyakhala akakwazi ngokukhuluma. Njengoba isonto liqala siqonda enkantolo,” kusho uNkk Sima. Uthe ihhashi balithenga ngo-R25 000 e-Underberg. UGama, weDundee July, uthe akulona iqiniso asolwa ngakho.
Uthe ihhashi belilandelwa amajaji azimele njengokwenjwayelo nalapho libonwe liholobha esikhundleni sokutelebhela.
“Ngaphandle kwalokho mina angihlangene nokujajwa kwamahhashi. Okunye indaba yamahhashi awuhlobo lwe-Pure Breed ikhulunywe nawuhulumeni wesifundazwe othe kufanele aqhudelane wodwa ngenxa yejubane lawo,” kusho uGama.
Umnikazi wehhashi elinqobile, uMnuz Ernest Lujiva, uthe ngemali yakhe uzokwakha umuzi abuye aqhube indodana yakhe efunda uGrade 11 anakekele nehhashi ngoba kuyabiza.
UMnuz Thabo Mofokeng wezeMidlalo nokuNgcebeleka esifundazweni, uthe bazwile ngesikhalo kodwa bebengazi ngokuya enkantolo.
Uvumile ukuthi lolu hlobo kwamahhashi kwavunyelwana ukuba lugijime lodwa kodwa kwaba yiKZN Rural Horse Riding Association eyathi awasale esegijima najwayelekile.
USihlalo weKZN Rural Horse Riding Association, uMnuz Menzi Buthelezi, uthe isizathu sokugijima kwala mahhashi najwayelekile sadalwa wukuthi kwase kuzophazamiseka izinhlelo eziningi zomjaho uma ekhishwa. Uthe kumiswe ukukhokhwa kwemiklomelo kaGrade 1 kuze kuphothulwe uphenyo oluzohlanganisa nama-video. UVALO KUQOTHWA ABAMATEKISI
Thuthukani Leroy: Inkinga ngukuthi izinkabi aziboshwa eMzansi. Aziqali futhi azigcini ukuchitha igazi.
Mfundo S’gcinoe Samangunie Mngunie: Kazi unembeza sewashonaphi kubantu? Umbulala kanjani nje umuntu ekubeni wazi kahle ukuthi unomndeni nabantu abamthandayo?
Bhambatha Ka Mancinza: Into eshodayo embonini yamatekisi yisikole, ukube umbombo kathisha bawubona ngabe bahlala phansi balungise izinkinga ngomlomo bayeke isibhamu.
Nkosikhona Dlamini: Kazi yini imbangela yakho konke lokhu. Kungani umsebenzi wamatekisi ulawulwe ngesibhamu? Sithi dudu kuyo yonke imindeni elahlekelwe. INJABULO UZUMA EFIKA KWI-MPUCUZEKO Menzy Biyela: Wayekade eyekeleni sonke lesi sikhathi? Hhayi suka bathanda kabi uma sekuzovotwa befuna kube sengathi bayasithanda singamabhinca.
Buti Phumoh Ngcobo: Akakhankasi kepha ukhuluma okumele kwenzeke kusukela ngonyaka ozayo. Vele Impucuzeko kumele ibe seMoses Mabhida lapho abantu bezobuka kahle abaculi behlezi phansi hhayi la kumiwa khona. Anisimele nina nepolitiki eshibhile ngoba nazi kahle ukuthi akaseyena umengameli angazi ukhankasa ngaliphi uma usho kanjalo. USALINDE IMVUME YOKUSEBENZA USOLINAS Mbongi Dlamini: IChiefs nokuthatha izinto ngonyawo lonwabu, siyahamba isikhathi.
Robs Mfokazinja Ziyamkhonkotha Mthembu: Ayifike bo kesibone uphetheni noma usazoqhubeka la kwagcina khona uSteve Komphela.