Usethatha umhlalaphansi uJoe Hudla
USETHI khumu kwezokusakaza umakadebona kulo mkhakha uJoe Hudla. UJoe, ozakhele udumo ngokusakaza ibhola kuKhozi FM nakuSABC 1, useneminyaka eyibambile kulo msebenzi.
Ngokuthola kweSolezwe, uJoe ulokhu eyikhuluma eyokushiya kwakhe kodwa ukuthi kuzokwenzeka nini akukacaci kahle.
Umthombo weSolezwe uthe ngesikhathi Ukhozi FM lusakaza bukhoma umdlalo wamanqamu weNdebe yoMhlaba phakathi kweFrance neCroatia ePoeple’s Park, uJoe wayiveza eyokushiya.
“Wakhuluma wathi ngemuva kwezinyanga ezine uzoshiya. Kwagcina sekushintsha ingxoxo ngoba abantu babengalindele,” kusho umthombo.
Omunye ukuqinisekisile ukuthi lo msakazi usezothatha umhlalaphansi.
Owesithathu osebenza kuKhozi FM obemanqika ukukhuluma uthe yindaba eyaziwayo ukuthi uJoe usezoshiya.
“Usemdala angithi. Yingakho-ke ehamba. Kodwa mfonele akuchazele kahle. Akakukhonzile kodwa ukulokhu evela emaphepheni. Mzame,” kuchaza umthombo ocele ukuthi lingalokothwa livezwe igama lakhe.
Ethintwa uJoe ukuqinisekisile ukuthi usethatha umhlalaphansi. Nokho ubengakwazi ukukhuluma kahle ngoba bekuzwakala ukuthi usendleleni.
“Ngicela ungizame kahle ngemuva kwenyanga ukuze ngizokhuluma konke engifuna ukukuveza,” kusho uJoe.
UJoe akagcini kuphela ngokusakaza ezemidlalo kuKhozi FM kodwa uphinde abe ngumdidiyeli omkhulu.
Uzakhele olokhulu udumo ngokubabaza uma esakaza athi “ha!” noma athi “we madoda!”.
Unokuthi futhi “yaphela iPirates yabantu” uma kudlala i-Orlando Pirates isidliwa.
Usewine imiklomelo eyahlukene ehlanganisa neyokuba wumsakazi wezemidlalo ovelele kumaMTN Radio Awards asebizwa ngamaLiberty Radio Awards.