Okuphakanyiswe kuvalwa oweBRICS
UNGQONGQOSHE wezeziMali KwaZulu-Natal, uNkk Belinda Scott, ugqugquzele osomabhizinisi bamazwe eBRICS ukuthi batshale imali yabo eDube Trade Port okuyisikhungo sezomnotho esiseduze neKing Shaka International Airport.
UNkk Scott uthe maningi amafemu aseDube Trade Port okubalwa awezolimo, awezimoto, awobuchwepheshe nokunye.
IBRICS Business Council ebiseNkosi Albert Luthuli International Convention Centre ifinyelele emaphethelweni izolo njengoba kuqala ingqungquthela yeBRICS ezoba seGauteng kusukela kusasa iphele ngoLwesihlanu.
OSihlalo beBRICS Business Council, okukhona kubo noDkt Iqbal Surve, baphinde basayina isivumelwano sokuzibophezela ngokuthi bazothuthukisa umnotho wamazwe abo.
IBRICS imemezele ukuthi izoba nenhlangano eklelisa amazwe ngomnotho ukuze kungahlali kuyizinkampani ezintathu kuphela eziklelisa amazwe ngokomnotho.
Lezi zindaba zimenyezelwe nguMnuz Geoffrey Qhena obesekomitini elidingida ngomnotho kwiBRICS Business Council.
“Ikomiti ebelikhuluma ngomnotho liphakamise ukuthi kusungulwe inhlangano eklelisa amazwe eBRICS ngomnotho,” kusho uQhena.
IBRICS iphinde yadingida ngohlelo lokusungulwa kwesikhwama esizosiza abathuthukisa umnotho benakekela imvelo.
Kuphinde kwagqugquzelwa osomabhizinisi ukuthi bafake izicelo zoxhaso kwiNew Development Bank edume ngokuthi yiBRICS Bank enamahhovisi eSandton.
Izihambeli zeBRICS zisonge usuku ngokuya eDube Trade Port lapho zitshelwe ngamathuba omnotho akulesiya sikhungo, zaphinde zachazelwa nangezinhlelo zeRichards Bay Industrial Development Zone okuyisikhungo esinomhlaba ozoba nezinkampani ezehlukene. Lesi sikhungo sisiza osomabhizinisi ngezinsiza uma betshala imali KwaZulu-Natal.