Sebezoseshwa abathenga kwaWoolies
SEBEZOSESHWA abantu abangena ezitolo zakwaWoolworths, eThekwini, emuva kokwanda kwezigameko zamabhomu ezitolo zawo ezikuleli dolobha.
AbakwaWoolworths bazwakalise ukukhathazeka ngokutholakala kwamabhomu ezitolo zabo ezisePavilion, Gateway nesisenkabeni yeTheku.
Abophiko lwezokuxhumana kwaWoolworths batshele Isolezwe ukuthi bazoqinisa ezokuphepha ezitolo zabo futhi amakhasimende azokubona lokhu.
“Sikhathazekile ngezigameko zamabhomu ezenzeka ezitolo zethu eziKwaZulu-Natal nakwezinye izindawo zakulesi sifundazwe. Sesiqale uhlelo lokuthi uma umuntu engena esitolo kube nobuchwepheshe obubheka ukuthi akukho yini okuyingozi akuphethe. Lokhu sikwenzela ukuphephisa amakhasimende ethu nabasebenzi,” kusho abophiko lwezokuxhumana esitatimendeni.
Bebuzwa ukuthi bangathini kumakhasimende abo asesaba ngisho ukubeka unyawo ezitolo zakwaWoolworths, bathe basebenzisana namaphoyisa, oKlebe futhi kunethimba labo langaphakathi eliphenya izigameko zokutshalwa kwamabhomu kulezi zitolo.
“Amakhasimende ethu sicela ehlise umoya aqhubeke eze ezitolo ngesikhathi sisaphenya ngalezi zigameko.
“Siyawathembisa ukuthi senza konke okusemandleni ukuqinisekisa ukuthi aphephile. Kuzokwenzeka ukuthi aseshwe uma engena ezitolo zethu ngoba sifuna ukuthi ahlale ephephile. Sicela abekezele aqonde ukuthi siqinise ezokuphepha ngenxa yezigameko zakamuva,” kusho abakwaWoolworths.
UBrigadier Hangwani Mulaudzi woKlebe, uthe basebenza kanzima ukuthola isixazululo enkingeni yokutshalwa kwamabhomu neyokusabisa ngokuthi kunamabhomu angase aqhume.
Ukhumbuze abantu ukuthi kuyicala ukusabisa ngebhomu elingekho futhi owenza lokho uzovalelwa ejele.