Abasayingeni eyamatekisi abasinde esibhicongweni
ABASINDE kubulawa abashayeli bamatekisi abangu-11 eColenso, ngaseMnambithi ngoMgqibelo, bathi bayayeka kule mboni ngemuva kokusinda kulokhu kuhlasela.
Abashayeli ababili, abalaliswe esibhedlela lapho begadwe khona ngamaphoyisa, bebekhuluma neDaily News enguzakwabo weSolezwe.
UMnuz Nkululeko Mlaba (31) uthe ukuba akavikelwanga abakubo ngabe ufile. Uthe unesiqiniseko sokuthi bebebabili abahlaseli kodwa munye obedubula ngesibhamu esikhulu.
Uqhube wathi bonke bebengabashayeli abebesebenzela usomatekisi obeyongcwatshwa.
“Kungani kumele sithelwe amachaphazelo ekubeni abantu abalwayo kungabanikazi bamatekisi? Ngifisa ukululama ngiye ekhaya. Angisaphindeli kule mboni. Anginaso isicucu semfundo, ngizobona ngokuhamba kwesikhathi ukuthi ngenzani,” kusho uMlaba. UMlaba uthe bebengu-16 etekisini. Omunye osindile, uMnuz Vukani Magubane (28), uthe bese esebenze njengomshayeli iminyaka emine kusomatekisi obengcwatshwa.
“Anginawo omunye umsebenzi ngaphandle kwalo. Ngiyayeka. Uma laba bantu bengakwazi ukuxazulula izinkinga zabo ngaphandle kokulimaza thina ngingamane ngihlale ekhaya,” kusho uMagubane.
I-South African National Taxi Council (Santaco) nezinye izinhlaka zabashayeli bamatekisi bazwakalise ukukhathazeka ngalesi sehlo nokuzwelana nemindeni yabashonile.
Okhulumela iSantaco, uMnuz Sfiso Shangase, uthe ufisa kubekhona ukuthula embonini yamatekisi waduduza nemindeni yababulewe.
Uthe abamatekisi ababulalene akusibona abaKwaZulu-Natal, abaseGoli.
“Osomatekisi baseGoli basuke eGoli, bazosulela udlame lwamatekisi KwaZulu-Natal,” kusho uShangase.
UMnuz Vusi Ndlovu weSouth African Taxi Workers Organisation eyaziwa ngeQina Mshayeli uthe bazwakalisa ulaka nokukhala abashayeli ngalesi sehlo.
“Singabashayeli bamatekisi sithi dudu kuyona yonke imindeni eshonelwe. Sicela ukuthi uhulumeni ahlangane nazo zonke izinhlaka ezikhona embonini yamatekisi ngoba manje uhulumeni uhlaka asebenzisana nalo kakhulu yiSantaco kodwa nathi sikhona akasondeli kithina,” kusho uNdlovu.
Okhulumela iSouth African Taxi and Transport Alliance, uMnuz Bafana Mhlongo, uthe izinkinga ezibhekene namatekisi ziningi futhi ngeke zixazululeke uma ungqongqoshe eqhubeka namanga.
“Uhulumeni uhluleka ukubhalisa amatekisi, alungise okufunwa abashayeli nosomatekisi,” kuchaza uMhlongo.
Uthe ukubulawa kwabashayeli kuhlangene nodlame lwamatekisi aseMnambithi hhayi awaseGoli.
UNgqongqoshe wezokuThutha nokuPhepha KwaZulu-Natal, uMnuz Mxolisi Kaunda, uthe kuyaphenywa ngesigameko kanti asihlangene nempi yemboni yamatekisi eMnambithi.
UMengameli weSouth African National Taxi Council, uMnuz Phillip Taaibosch, izolo ukhale ngokuthi ababulali bosomatekisi ababoshwa.