INehawu yamukela ukwesula komqondisi wezaseKhaya
UNOBHALA weNational Education, Health and Allied Workers Union (Nehawu), uMnuz Zola Saphetha, uthe basamukela ngezandla ezimhlophe isinqumo sokusula emsebenzini koMqondisi woMnyango wezaseKhaya, uMnuz Mkhuseli Apleni.
U-Apleni usule emsebenzini izolo izindaba zaqinisekiswa nguNgqongqoshe woMnyango uMnuz Malusi Gigaba.
USaphetha uthe u-Apleni ubephethe ngesandla sensimbi futhi ukusula kwakhe kuzosusa umthwalo emahlombe abasebenzi.
“Kudala sikhala ngaye sisho ukuthi ulahlekisela abakhokhi bentela ngezigidi ngenxa yezinhlelo zakhe zokuthi abasebenzi basebenze ngoMgqibelo. Ubengafuni ukubakhokhela kodwa ubeluyisa enkantolo udaba lokuthi kufanele baholelwe. Ubengafuni nokuqasha abanye abasebenzi yize zikhona izikhala zomsebenzi,” kusho uSaphetha.
Uthe bayathemba ukuthi ukuhamba kwakhe kuzojika izinto eMnyangweni wezaseKhaya ngoba kuzoqashwa abantu futhi nabasebenzi bazoba nomdlandla wokusebenza ngaphandle kokucindezelwa ngumphathi.
IPhini likaNobhala wePublic Servants Association, uMnuz Tahir Maepa, nalo lithe bayakwamukela ukuhamba kuka-Apleni abamchaze njengomuntu obehluleka wukuphatha kahle abasebenzi.
Bathe bazomkhumbula ngesinqumo sakhe esimbi sokusebenzisa abasebenzi ngoMgqibelo bese bengaholelwa.
UGigaba uthe bazomemezela umqondisi ozobamba ngesonto elizayo bese beqoka umqondisi omusha kungakapheli izinyanga ezintathu.
Ubonge u-Apleni ngokuzinikela emsebenzini wakhe esho nokuthi bamfisela okuhle njengoba eseyosebenza eDiscovery Banking.