Bashaqiswe wukumoshwa kukaR19bn kwa-Eskom
USIHLALO wekomiti elibhekele amabhizinisi kahulumeni ePhalamende, uNkk Lungi Mnganga-Gcabashe, uzwakalise ukukhathazeka ngokumosheka kukaR19 billion kwa-Eskom.
UNkk Mnganga-Gcabashe uthe bakhathazekile ngokumosheka kwemali futhi bazomema izikhulu zakwa-Eskom ukuthi zizokhuluma nabo ngombiko wale nkampani wezimali.
“Sishaqekile ukuzwa ukuthi kusetshenziswe uR19 billion kusukela ngo-2012 kuthengwa izinto ezingenasidingo kwaEskom. Sizobacela ukuthi bazosithulela umbiko wabo wezimali ukuze siqonde ukuthi kwenzekani kuleya nkampani,” kusho uNkk Mnganga-Gcabashe.
UNksz Natasha Mazzone okhulumela iDA emabhizinisini kahulumeni uthe akufanele abantu bakhokhe ngokuthi kunyuswe ugesi ngoba babengekho kumoshwa imali kwa-Eskom.
“Sikhathazekile ukuthi i-Eskom ilahlekelwe wuR2.3 billion ngonyaka wezimali ka-2017/18 nokuthi kusukela ngo-2012 sekumoshwe uR19 billion. Ukulahleka kwale mali wumphumela wenkohlakalo nokungaphathwa kahle kwemali nokuqashwa kwabantu abangenawo amakhono adingekayo kwa-Eskom,” kusho uNksz Mazzone.
Uthe kuqashwe abasebenzi abangu-970 njengoba kwa-Eskom sebenabasebenzi abangu-48 628 okukhona kubo izikhulu eziholelwa uR66 million.
Ucele i-Eskom ukuthi ingawunyusi ugesi ngoba lokhu kuzosho ukuthi abantu bakhokhela inkohlakalo abangahlangene nayo.
Izolo uSihlalo weBhodi lakwaEskom, uMnuz Jabu Mabuza, umemezele ukuthi balahlekelwe wuR19 billion futhi bazosebenza kanzima ukubuyisa isithunzi kwaEskom. Ubalule ukuthi njengoba ziziningi izikhulu zakwa-Eskom ezithinteka enkohlakalweni kufanele zithathelwe izinyathelo ukuze kubuye isithunzi sale nkampani.
“Sizoqhubeka nokulungisa isimo kwa-Eskom. Kuyimanje kunamacala angu-250 aphenywayo. Siyathemba isimo sizoshintsha ngoba iziteshi zethu zikagesi ziyasebenza futhi nezintsha okuyiMedupi neKusile ziqalile ukukhiqiza ugesi,” kusho uMabuza.
Uthe badinga ukuthi kube nabantu abanamakhono adingekayo ezikhundleni zokuphatha.
UDkt Phakamani Hadebe oyisikhulu esiphezulu kwa-Eskom uthe imali ayingeni kahle futhi nezikweletu zomasipala zinkulu.
Uthe banezinhlelo zokwehlisa izindleko, kuthuthukiswe ibhizinisi, kuthengwe amalahle asezingeni ngemali encane kukhokhwe nezikweletu zale nkampani.