Abamatekisi abafunde ukuxazulula izinto ngomlomo
SEKUPHINDE kwagobhoza igazi embonini yamatekisi emuva kokuba ngoMgqibelo kubulewe abashayeli abawu-11 abebephuma emngcwabeni womqashi wabo naye obebulewe.
Ababulewe basale endaweni yobugebengu kwathi abalimele baphuthunyiswa esibhedlela. Bebekade behamba ngemoto eyodwa balalelwa unyendle eColenso, ngaseMnambithi. Kukhona nabathathu abalimale kanzima. Kusolwa ukuthi abashayeli bamatekisi, abazinze eGauteng, babulawe ngenxa yombango okhona phakathi kosomatekisi baseTembisa naseKempton Park.
Kuyacaca ukuthi ababulali bebefuna ukusizila uma kubhekwa ukuthi kutholwe amagobolondo ezinhlamvu awu-250.
Izithombe zetekisi ebimbobombobo futhi imanaphanapha yigazi ezicabheni nasemawindini ziyixoxa yonke indaba yesihluku esinyatisa igazi.
Akuselula ukuqonda ukuthi bantu abasebenza embonini kumele babizwe ngani ngoba igama elithi osomabhizinisi alisabafanele ngendlela abenza ngayo futhi kwakona ukuthutha umphakathi abasakulungele.
Abashayeli abawu-11 ababulewe abavelanga nje badutshulwa, ukhona noma bakhona abathume ababulali futhi basembonini yamatekisi abebazi ukuthi bazobe bekuphi futhi behamba ngayiphi imoto.
Akuqondakali ukuthi yini ebanga abantu abangabanikazi bomsebenzi uma belwa izimpi zabo babulale nabashayeli. Impi yamatekisi isimehlule uhulumeni namaphoyisa. Akwazeki noma yinto yamabomu ngenxa yokuthi kunezikhulu zikahulumeni namaphoyisa okusolwa ukuthi zinamatekisi yize lokhu kungavumelekile.
Yize kungasho ukuthi abantu bayaphazamiseka uma evalwa amatekisi kodwa ukube uhulumeni uzimisele ngempela ukunqanda lolu dlame kufanele ngabe kade satholakala isisombululo.
Kodwa kunalokho abantu bamatekisi bazenzela umathanda, bayacanasa sengathi baphethe izwe.
Kwenzeka kanjani ukuthi ezweni elinezobunhloli kube nezigebengu ezenza umathanda njengabantu bamatekisi kodwa ingalo yomthetho ingafinyeleli kuzo?
Kuyishwa nje ukuthi inqwaba yabantu ithembele ematekisini ngoba kufanele ngabe ayavalwa kuze kube abanikazi bawo bafunda ukuthi izinto azixazululwa ngesibhamu kodwa zilungiswa ngomlomo.