I-Kaizer Chiefs isilandele imfundamakhwela yomqeqeshi

MHLELI: Ngifisa ukuzwakalisa ilaka lami ngokuqokwa komqeqeshi omusha weKaizer Chiefs. Sengathi silandelwe uSteve Komphela wesibili la, umehluko wukuthi lona umhlophe.

Okwenza ngisho lokhu wumlando wakhe. Akukho okuphathekayo aseke wakuzuza selokhu aqala ukuqeqesha. Kwi-Kaizer Chiefs ayidingeki imfundamakhwela ezophinda isizwe yimpuphu uPatrick Mabedi. Sisazophela yisibhaxu nakule sizini.

I-Kaizer Chiefs kwakumele ithole umqeqeshi osezingeni eliphezulu futhi onesipiliyoni kwezokuqeqesha aphinde abe nomlando omuhle wokuwina izindebe. Kwakumele bathole umqeqeshi ofana noRuud Krol noma uHarve Renard. Uma ubheka umlando wabaqeqeshi beChiefs abenza kahle babenesipiliyoni besezingeni eliphezulu futhi belazi ibhola lakithi eNingizimu Afrika. Ungabala uTed Dimitru, Joe Frickleton, Jeff Butler bonke abenza kahle bengezona izimfundamakhwela.

Bengicela uKaizer Motaung abuyise uDoctor Khumalo azosiza uGiovanni Solinas ngoba uDoctor uyayazi iChiefs baphinde balande uFarouk Khan ngoba kungenjalo sisazobhubha yisibhaxu. U-Patrick Mabedi akasishiye ngoba uyasimoshela.

Bengibuka umdlalo weChiefs neSundowns. Bekumele kufakwe abadlali abasha hhayi amakhehla ngoba isikhathi sawo sesiphelile. Enye into exakayo kungani manje engasadlaliswa uPhilani Zulu kunalokho kudlaliswa impuphu uLetlogonolo Mirwa. Lo mfana yingane ephuma kwiMotsepe League. OkweChiefs kuyaxaka ungathi izinqumo zithathwa umuntu odle amponjwana.