Awushayelwe ihlombe umbono weCosas
Innocent Meyiwa EMALANGENI MHLELI: Ngentobeko enkulu ngithi ake ungiphe isikhadlana nje kwelakho kengibeke umbono wami ukuze udlulele nakwabaningi.
Umbono wami umayelana nenkulumo engiyizwe ikhulunywa ngusihlalo weCosas osanda kukhethwa eGauteng.
Lo mholi ukhulume ngokuthi abaholi bethu kuhulumeni kufanele bafundise izingane zabo ezikoleni zomphakathi noma ezikahulumeni hhayi ezikoleni ezizimele.
Uthe uma bekholelwa emfundweni kahulumeni ukuthi isezingeni elihle abafundise nezingane zabo kulezi zikole.
Nami ngikholelwa kakhulu kulokhu. Empeleni le nto kufanele ngàbe yenziwa kudala singena nje embusweni welungelo lokuvota kodwa labo abasemandleni abakwenzanga loko futhi bayakuziba ngoba bona baziholela imali eningi eyenza bakwazi ukukhokhela imali enkulu ekhokhwa ezikoleni ezizimele.
Lo mnyakazo weCosas kufanele ushayelwe ihlombe bese uyasekelwa ngumuntu wonke ikakhulukazi labo abazibiza ngabaholi bomphakathi. Ngiyathemba ukuthi ofunda umbono wami uzoqaphela ukuthi angilibalulanga igama lalo mholi weCosas. Ngikholwa nawukuthi bakhona nabanye abayizwile isakazwa kwi-eNCA ngo-6.30 ngoLwesihlanu.
Loku ngikwenze ngabomu ngoba mina ngikholelwa ekutheni umuntu okhuluma egameni lenhlangano akufanele kugqanyiswe igama noma imibono yakhe njengoba kwenzeka nje kule nyanga lapho sibona kugqama igama nemibono yomuntu oyedwa sengathi wayezimele kanti konke ayekwenza wayekwenza egameni lenhlangano engeyena nomsunguli wayo.
Akungabikhona umuntu oba mkhulu ngaphezu kwenhlangano ngoba sizoba nenkinga kusasa ngoba awukho umgomo olawula le nqubo. BDK ETHEKWINI