Uzimisele ngokulwela indawo yakhe kwiDowns
UMDLALI omusha weMamelodi Sundowns, uLyle Lakay, akayicabangi eyokuphenduka ukudla kwebhentshi kuleli qembu okuhluleke kulona inqwaba yabadlali abasezingeni eliphezulu.
ULakay ujoyine iSundowns ngesonto eledlule esuka kwiCape Town City watshelwa emehlweni ukuthi uzoshintshwa indawo ayidlalayo. Nakuba aziwa ukuthi ungumdlali wasezinhlangothini kodwa kwiSundowns uzobanga indawo noTebogo Langerman noSiyabonga Zulu emuva kwesokunxele.
ULakay udlale okokuqala kwiSundowns ngesikhathi ibhekene neKaizer Chiefs emdlalweni iShell Helix Cup eFNB Stadium ngoMgqibelo ntambama. ISundowns, edlalise abadlali abangajwayele ukudlala, inqobe ngo 2-1.
“Ubani onganqaba efunwa yiSundowns? Impumelelo eyitholile e-Afrika yenza ungacabangi kabili uma ingqongqoza. Ngesikhathi ngizwa ukuthi iSundowns iyangifuna ngivele ngavumela phezulu ngathi ngifuna ukuhamba,” kusho uLakay.
“ISundowns inabadlali abaningi abasezingeni eliphezulu. Vele abantu bazohlala bekhuluma kodwa konke kulele kuwena ukuthi uyakholwa futhi usebenza kanzima. Ekugcineni abantu ngeke bakuthathele isinqumo, uwena onezwi lokugcina ngoba uma ufaka umfutho, uzikhandla, wenza lokhu umqeqeshi akufunayo uzokudlalisa. Uma ungawathathi amathuba akuvelelayo ngeke wazi.”
Umqeqeshi weSundowns, uPitso Mosimane, ukusho kaningi ngesizini edlule ukuthi ukudlala kwiCAF Champions League, ukuwelela phesheya, ithuba lokudlala kwiBafana Bafana nokuhola itshe lemali yikhona abakusebenzisayo ukudoba abadlali ukuthi bajoyine amaBrazilians. Kwenye yezinkulumo zakhe uthe abadlali bamanye amaqembu kufanele bazikhethele ukuthi bayathembeka emaqenjini abo babulawe yinkemane noma bawelela ezweni loju nezinyosi okuyiChloorkop.
“Umqeqeshi ungitshelile ukuthi uyangifuna, ufuna ngize lapha. Njengoba kwaziwa ukuthi indawo engiyidlalayo isohlangothini kwesokunxele, ungichazele ukuthi kungani efuna ukungidlalisa emuva kwesokunxele. Yingoba nginejubane.
“Uma nje umqeqeshi ekholwa ukuthi ngingawenza umsebenzi kuleyo ndawo, kungani ngingeke ngiyidlale? Ngikwamukele lokho ngoba ebholeni lesimanje noma udlala emuva kodwa uchitha isikhathi esiningi uhlasela kunokumaka,” kusho uLakay.
“Inhloso yami enkulu wukuthola indawo esikimini. Emuva kwalokho ukubamba umgqigqo kubalulekile, ngisize iqembu liwine izindebe njengoba lenza yonke iminyaka.”
UMosimane uyincomile indlela uLakay adlale ngayo emdlalweni wakhe wokuqala.
ISundowns izobhekana ne-AS Togo-Port emdlalweni weCAF Champions League wamaqoqo eLoftus Stadium, ePitoli, ngoLwesihlanu. AmaBrazilians akuwahambeli kahle selokhu kuqale imidlalo yamaqoqo njengoba engakawini emidlalweni emithathu.