Kusinda kwehlela kowe-Ajax Cape Town
UNENGEBHE ngokuthi iqembu lakhe lingase libalwe nazodliwa yizembe usihlalo we-Ajax Cape Town, u-Ari Efstathiou, oveze inqwaba yezinkinga abhekene nazo eqenjini.
Ngokusho kwakhe izinkinga ezibonwa ngabantu kwabezindaba nakho konke okuthinta ukusetshenziswa kukaTendai Ndoro, yinto encane kakhulu kunalena abhekene nayo ngaphakathi eqenjini.
Kuhambe abadlali abawu-11 abebesesikimini se-Ajax ngesizini edlule. U-Ari uthe kuyinkinga lokhu ngoba abazi noma kufanele baqinisele iPremiership noma ukudlala kwiNational First Division (NFD).
“Akekho owaziyo ukuthi sizobe sidlala kusiphi isigaba ngesizini ezayo kodwa okusobala wukuthi konke esizokwenza sizokwenza sebeqedile abanye. Lokhu kusibeka ekutheni sibe ngelinye lamaqembu angase adliwe yizembe ngisho ngabe sidlala kusiphi isigaba,” kusho u-Ari.
Namuhla i-Ajax ihlele ukufaka isicelo enkantolo sokuthi ingaqali isizini okufanele kwenzeke ngo-Agasti 4. Kusenendaba yokuthi iPremier Soccer League (PSL) iludlulisele phambili udaba lokuvunwa kwe-Ajax yisinqumo sejaji uDenise Fisher obeke eceleni isinqumo sikaWilliam Mokhari SC (umahluleli weSafa) sokuphuca i-Ajax amaphuzu.
Amaphuzu abekade enikwe amanye amaqembu kodwa ngemuva kwesinqumo sikaFisher imidlalo yokuhlunga enqotshwe yiBlack Leopards ifana nento engekho. Ngenxa yalesi sinqumo sikaMokhari neMTN 8 kunongabazane ngokuqala kwayo ngesikhathi ngoba iyathinteka.
Lesi sikhulu sithe sesisaba nokuyobabona abadlali uma beziqeqesha ngoba siyayazi imibuzo esiphoqeleka ukuthi siyiphendule.
“Umvimba kanjani umdlali wakho othembele kuye uma ethi ucela umdedele ngoba nawe awulazi ikusasa ukuthi likuphatheleni? Kuningi okunzima engibhekene nakho eqenjini ngaphandle kwalokhu okukhulunywa ngakho kwabezindaba. Ngizijubile ngahlangana nabo abadlali ngoMsombuluko ngiyozama ukubachazela ngesimo kodwa ngibuyele emuva ngizibonela kwamina ukuthi abangizwa nokuthi ngithini ngoba konke lokhu ebengibatshela khona akwenzi lutho ukubaqinisa idolo ngekusasa labo nemindeni yabo,” kulandisa u-Ari.
“Sibhekene nengwadla ngenxa yale nto kodwa ngeke sihlale phansi sithule uma kudlalwa ngathi. Inhloso yethu akukona ukuphazamisa kepha sifuna ubulungiswa. Kumanje sizama izinto ezingakaze zizanywe ukuthi sisayinise abadlali esibabonayo ukuthi bazokwazi ukudlala kuzona zombili izigaba. Inzima le nto ngoba ithinta namaholo manje kwakhona ukuthola labo badlali wumqansa.”