Akayingeni eyokuya kwiChilli Boys oweZimnyama
LUSEYINDIDA udaba lomdlali wasemuva kwi-Orlando Pirates uThabo “Festival” Matlaba obekuthiwa usejoyine iChippa United ngemuva kokubolekiswa eZimnyama.
NgoLwesihlanu olwedlule iChilli Boys ibhale ekhasini layo likaTwitter yathi: “Usihlalo weqembu uSiviwe Mpengesi useqinisekisile ukuthi uBernard Morrison, Thamsanqa Sangweni noThabo Matlaba usebasayinisile. Bonke basuka kwiOrlando Pirates”.
Ngakolunye uhlangothi iPirates ibhale ngosuku olufanayo kwi-website yayo ukuthi nguSangweni oshiya leli qembu olibangisa kwiChippa, akukho ekubhale ngoMorrison noMatlaba esitatimendeni.
Ngokuthola kweSolezwe uMatlaba akayingeni eyokuya kwiChippa, empeleni ugcizelela ukuthi akukho akutshelwe yiPirates ngeChilli Boys.
“Asazi thina ukuthi la mahemuhemu ashiwo ngoMatlaba aqhamukaphi. Ngokwazi kwami ungumdlali wePirates futhi unenkontileka anayo neqembu,” kusho u-Abbie Rasimphi oyimenenja kaMatlaba.
Leli phephandaba lishayele uFloyd Mbele oyisikhulu esiphezulu kwiBucs limbuza ngalolu daba. Nokho akafunanga ukuphumela obala ngokuthi ngempela kwenzekani.
“Angazi lutho ngalokho mina. Angikho futhi ehhovisi ngicela ushayele khona,” kusho uMbele oqale ngomoya omuhle okuthe sekungena igama likaMatlaba washintsha.
Isolezwe libe selithinta uPeter Koutroulis oyisikhulu esiphezulu kwiChippa ukuze acacise ukuthi uMatlaba usesayinile yini kwiChilli Boys. Naye uhluleke wancama ukukhuluma into eqondile.
“Ngithinte kusasa (esho namhlanje), ngizobe senginolwazi lonke, okwamanje akukho ozokuthola,” kusho uKoutroulis.
Ngesikhathi leli phephandaba limbuza ukuthi ngabe iChippa ilubhale kanjani udaba lokusayina kukaMatlaba ekhasini layo kwiTwitter ekubeni kungaqinisekisiwe, ubhoke
ngolaka wathi: “Ngiyakutshela
ngithi ngithinte kusasa, ayisekho enye impendulo enginayo, konke kuzocaca kahle kusasa.”
Akukhona okokuqala iChippa nePirates bememezela indaba yokusayina kwabadlali kodwa kugcine kunobuhixihixi.
Kwaba ngesifanayo kuThabo Rakhale noBrighton Mhlongo abagcina belibangisa ePort Elizabeth.
Ubudlelwano phakathi kwala maqembu nokho bubukeka bubuhle njengoba eshintshana ngabadlali mihla namalanga. Phakathi kwabadlali asethengiselane ngabo singabala uLinda Mntambo ongumgadli, Diamond Thopola odlala emuva noSangweni (Thamsanqa) ukubala abambalwa.
Kwenzeka lokhu nje, uMatlaba watshela Isolezwe ukuthi yena usazimisele ngokulilwela ijezi kwiPirates yize ephenduke ukudla kwebhentshi ngesizini edlule. Kuphele isizini ibhande likakaputeni seligqokwa uHappy Jele ngenxa yokuthi uMatlaba bese esizwa ngendaba isikimu kwiBucs.