Kuzoyisiza i-Eagles ukufika kukaKG: Sikhakhane
UROGER Sikhakhane ongumqeqeshi weRoyal Eagles uthi kuzozuza izinhlangothi zonke ngokusebenzisana kwakhe noKagiso “KG” Dikgacoi ozoba yiphini lakhe kwisizini ezoqala ka-2018/2019 kwiNational First Division (NFD).
Ngokusho kukaSikhakhane, onamava okukhuphula amaqembu kwiNFD awafake kwiPremier Soccer League (PSL), uDikgacoi nguyena ozicelele leli toho ngenhloso yokuthola ulwazi kwazise useqale izifundo zokuqeqesha.
“Ungitshele ukuthi wenza iziqu ngaphansi kwe-Uefa. Ngicabanga ukuthi uzokhula njengomqeqeshi ngoba uyafuna ukufunda. Ngakolunye uhlangothi kuzolisiza futhi neqembu ngoba abadlali babukela kuyena, bayamhlonipha njengoba enomlando ongadinge kuchazwa ebholeni,” kusho uSikhakhane.
UDikgacoi uwagaxe emgibeni amakhokho ngesizini edlule. Uwagaxa nje, ubesedlalele iBafana Bafana amahlandla awu-54. Emaqenjini awadlalelile singabala iLamontville Golden Arrows (abuyele kuyona kabili) kube yiFulham, Crystal Palace, Cardiff City (wonke ase-England).
Nokho uSikhakhane ucashe ngesithupha wangaphumela obala ukuthi ngabe uzokwazi yini ukufeza iphupho labaphathi be-Eagles lokukhuphukela kwiPremiership.
USikhakhane uthathwa njengenkunzi ekukhuphuleni amaqembu awasuse kwiNFD awafake kwiPremiership. Lokhu ukwenze kwiChippa United nakwiThanda Royal Zulu.
USikhakhane uqashwe yi-Eagles izinto zibheda eqenjini ngesizini edlule njengoba efike kukubi walivikisa izembe. Njengoba isizini ka-2018/2019 kuzoba ngeyakhe yokuqala egcwele, kulindeleke lukhulu kuyena kwazise nabaphathi beqembu okuyizicebi zakwaMpisane baziwa njengabantu abafuna ukubona iqembu lidlondlobala minyaka yonke.
“Ngingathi nje kuzobonakala ngoba iqiniso ukuthi amaqembu awu-16 kwiNFD, wonke anesifiso esisodwa okuwukuthi afuna ukukhuphukela esigabeni esiphezulu. Kuzoncika ekutheni uma silungisa iqembu kulesi sikhathi samalungiselelo silakha sifikaphi. Uma sihlele kahle kuzohamba kahle,” kusho uSikhakhane.
I-Eagles izozama ngakho konke okusemandleni ukuvikela isicoco seKZN Premier’s Cup esisiwine kabili kulandelana. Lo mqhudelwano uzodlalelwa eKing Zwelithini Stadium, eMlaza nasePrincess Magogo Stadium, KwaMashu ngempelasonto. Uma i-Eagles inganqoba lo mqhudelwano okwesithathu, izosithatha unomphelo isicoco esingumantunta nendishi.