Imfundo iyona emqoka kakhulu: owe-USSA
USHUMAYELA ivangeli lokusheba ibhola nemfundo umqeqeshi we-University Sport South Africa (USSA), uGeoffrey Tenoff, edle umhlanganiso kwi-SAB Under 21 National Championship ebiseThekwini esongwe ngempelasonto.
I-USSA inqobe umdlalo wamanqamu ngo 2-1 eKing Zwelithini Stadium ihlula iMpumalanga. Amagoli ashaywe nguThabang Chuene noKavendree Makhene. UChuene ugcine efake amahlanu kulo mqhudelwano. UKhulekani Masemola ushaye eleMpumalanga.
Lesi yisicoco sesithathu se-USSA eke yanqoba ngo-2011 nango-2016. Ompetha bale midlalo bathola isheke lika-R20 000 kuthi abaphume isibili bathole u-R10 000.
Ebuzwa ngekusasa labadlali bakhe, uTenoff, obe ngumqeqeshi ovelele, uthe okusemqoka wukuthi baqede izifundo zabo.
“Ngicabanga ukuthi iningi labo linalo ithuba lokudlala ezingeni eliphezulu. Sizoqinisekisa ukuthi siyabakhuthaza ukuthi baqede iziqu zabo. Uma sebeqedile sibasize ukuthi bathole amaqembu asesigabeni esikhokhelayo.
“Ngicabanga ukuthi ziningi izinhloli ebezikhona lapha.
“Kodwa ngicabanga ukuthi kumele kube nendlela ehlelekile, kungaqhamuki noma wubani azothatha umdlali amsuse ezinhlelweni ezihlelekile ezisiza yena kwezemidlalo nasezifundweni zakhe. Wonke umuntu ulangazelela ukuthi abadlali bagcine ezingeni eliphezulu kodwa ukwenza izinto ngesikhathi esifanele yiyona into emqoka,” kusho uTenoff.
UTristan Hansloo (18) we-USSA oqokwe njengePlayer of the Tournament uhambe emazwini omqeqeshi wakhe.
“Ukukhuluma iqiniso mina ngifuna ukuqeda izifundo zami bese ngiyabona ukuthi ngenzenjani,” kube yimpendulo kaHansloo uma ebuzwa ngezifiso zakhe zokuthola inkontileka esigabeni esiphezulu.
Uthe wenza izifundo ze-Economic Development e-University of Western Cape.
Nokho ujabulise okwengane ibona amaswidi uma ebuzwa ngoPercy Tau osethole amadlelo aluhlaza phesheya kwezilwandle.
“Wenze kahle kakhulu uPercy Tau. Kuhlezi kujabulisa ukubona umdlali waseNingizimu Afrika eya phesheya. Kuyisifiso sami ukuthi ngelinye ilanga nami ngiye khona,” kusho lo mdlali othe ufunzelelwa wuHlompho Kekana oyibamba kwiMamelodi Sundowns.