Umdlalo kaMadikizela-Mandela
KUZOHLONISHWA kuphinde kukhunjulwe uNomzamo Winnie Madikizela-Mandela ngomdlalo ozogijinywa yiqembu lesizwe labesifazane iBanyana Banyana.
Lezi zindaba zivezwe umengameli wenhlangano eyengamele ibhola kuleli, uDanny Jordaan, ngesikhathi ezobongela abadlali beSAB Under 21 Championship esongwe eThekwini ngempelasonto.
UJordaan uthe bafuna lo mdlalo ufuze lona waminyaka yonke iMandela Challenge ebungaza owayengumengameli wokuqala wentando yabantu, uNelson Mandela ongasekho.
UMadikizela-Mandela waba neqhaza elikhulu ekulweleni inkululeko yomuntu omnyama eNingizimu Afrika futhi wayeshade noMandela. Ushone kulo nyaka ngemuva kokugula isikhashana.
“Sahlangana noWinnie ngoDisemba nyakenye samazisa ngokuthi siyafisa ukuthi simhloniphe ngomdlalo. Nokho ugcine esishiyile. Siyaqhubeka nezinhlelo,” kusho uJordaan.
Uthe abakalazi usuku umdlalo ozoba ngalo nokuthi kuzoba ngobani izimbangi zeBanyana. Uthe njengoba iMandela Challenge ingoNovemba basahlela kahle ukuze imidlalo ingashayisani.
Lo mengameli obuyiselwe esikhundleni okhethweni lobuholi beSafa ngoMeyi uphinde wadalula ukuthi azimile izinhlelo zokuthi ngonyaka ozayo kuqale iligi kazwelonke yabesifazane.
Sekukhalwe kaningi ngokuthi indlela yokufukula ibhola labesifazane kuleli wukuthi kube neligi esezingeni.
“Siyaqhubeka nezinhlelo. URia Ledwaba (elinye lamaphini akhe) nguyena obheke lolo hlelo njengoba simatasa sifuna abaxhasi. Imidlalo yokuhlunga yeSasol League iba ngoDisemba, lawo maqembu yiwona azodlala kwiligi kazwelonke,” kusho uJordaan.
Khonamanjalo iqembu lesizwe lamantombazane lika-Under 17, lithole indawo yesithathu kwiBricks Tournament ebiseGoli.
ABantwana, abaqeqeshwa uSimphiwe Dludlu, bebebhekene neRussia, Brazil, China ne-India. Basebenzise lo mqhudelwano njengendlela yokuzilungiselela iNdebe yoMhlaba ese-Uruguay ngoNovemba.