UMarawa uzozwakala emsakazweni maduze
KUPHELILE kwabebeqagela ngoRobert Marawa nokubuyela kwakhe eSABC emuva kokuthi inhlangano yokusakaza imemezele ngokusemthethweni ukuthi uzozwakala kusuka ngoAgasti 1.
Kuke kwaba nesikhulu isidididi ngokuqashwa kwakhe emasontweni adlule.
Kulindeleke ukuthi uMarawa ethule izinhlelo ezimbili kanyenye. Uzozwakala kuMetro FM ethula ezemidlalo ngoMsombuluko kuya ngoLwesihlanu ngo-6 kuya ku-7.
Ngezinsuku ezifanayo uzophinde azwakale kuRadio 2000 kusuka ngo-6 kuze kube wu-8 ebusuku.
Okhulumela iSABC, uKaizer Kganyago, uthe konke obekungakalungiswa phakathi kweSABC noRobert kugcine kulungisiwe futhi iSABC isikulungele ukumamukela.
“Sikubheke ngabomvu ukuthi abuye azokwenza umsebenzi oncomekayo ezinhlelweni zethu kuphinde kube nokunyuka kwabalaleli ezinhlelweni azobe ezenza njengoba beqhubeka benyuka usuku nosuku,” kusho uKaizer. UMarawa uthe lokhu ukubona njengokuqhubeka kobudlelwano bakhe neSABC nokuzinikela kwayo ekuletheni izidingo zabantu. “Ukuthola ukwesekwa okukuleli zinga kubalulekile kimi ukuze ngizokwazi ukuphakela abalaleli izinhlelo ezisezingeni eliphezulu, ezifanele abalaleli bethu. Ukudlala kohlelo eziteshini ezimbili kanye kanye siyethemba kuzonyusa isibalo sabalaleli,” kusho yena.
Emasontweni adlule kuvele izindaba zokuthi kuphenywa izikhulu ezimbili zeSABC okukhona kuzo esibhekele ukusebenza khona, uChris Maroleng, okuthiwa azilandelanga umthetho ngokuqasha uRobert.
Iphephandaba eliphuma ngeSonto, libike ukuthi uMaroleng noNkk Marcia Mahlalela baziswe ukuthi bazobekwa amacala ngokubuyisa uRobert.
Uphenyo ngalolu daba lwaluqalwe ngobeyisikhulu esibambile eSABC, uNkk Nomsa Philiso, emuva kokuthola izikhalo kubasebenzi bekhononda ngokubuyiswa kukaRobert.
Emacaleni obekuthiwa bazobhekana nawo kubalwa elokwehlisa esikhundleni umsebenzi onqabe ukubhala incwadi encoma ukuthi kuqashwe kabusha uRobert.
Elesibili elokusayina inkontileka kaRobert ngaphandle kokuyihambisa kobhekele izimali zezemidalo ukuze asho ukuthi ikhona yini imali yokuholela uRobert.
Elesithathu elokusayina inkontileka ezodla imali eningi eSABC ekubeni uNkk Mahlalela kufanele kube nguye oqinisekisa ukuthi imali ayimosheki kule nhlangano.
URobert uzohola u-R7 000 ngohlelo olulodwa okusho ukuthi ngenyanga wenza u-R154 000 okuzodla iSABC u-R5.5 million eminyakeni emithathu.