Sifisa kuhlomule iningi kule mali emenyezelwe
KUSASA kuzosongwa ingqungquthela yeBRICS okuyinhlangano ehlanganiswe ngamazwe iBrazil, Russia, China neNingizimu Afrika.
Le ngqungquthela okungeyeshumi kulo nyaka iqale eGoli izolo.
Ngaphambi kwayo besekuqale kwakhona eminye imicimbi eyandulelayo nakhona obekuhloswe ngayo ukubheka ukuthi la mazwe angalekelelana kanjani ngaphandle kwezikhondlakhondla zaseNtshonalanga.
Emasontweni amabili edlule bekukhona iBRICS Media Forum eKapa. Ngeledlule eThekwini bekuneBRICS Business Council. Esinye sezimemezelo ezenziwe eThekwini sithe uhulumeni waKwaZulu-Natal uzotshala imali engaphezu kukaR200 billion kule minyaka eyisikhombisa ezayo.
UNgqongqoshe wezokuThuthukiswa koMnotho KwaZulu-Natal, uMnuz Sihle Zikalala, uthe le mali izosetshenziswa ekulungiseni imigwaqo, ojantshi bezitimela, ukuhlinzekwa kwamanzi nokuthuthwa kwendle, ugesi namachweba. Ugqugquzele osomabhizinisi ukuthi babheke amathuba okutshala imali nasezindaweni ezifana neRichards Bay Industrial Development Zone neDube Trade Port.
Ziyathokozisa lezi zindaba ezimenyezelwe uZikalala futhi zibuyisa ithemba ngoba uhulumeni nguye okubhekwe kuye kakhulu ukuthi enze izinhlelo ezizovula amathuba emisebenzi kungaba kwabafisa ukuqashwa noma kosomabhizinisi abazisebenzayo.
Uma kunezingqungquthela ezinkulu, ziningi izimemezelo eziyaye zenziwe ezisuke zikhombisa ukuthi kuyiwa phambili.
Siyathemba-ke ukuthi le mali ezosetshenziswa izohlomulisa kakhulu abantu baseNingizimu Afrika futhi kwande nabantu abahlomulayo ngemisebenzi ekhishwa nguhulumeni, kungahlali kungabantu ababodwa.
Sifisa kubonakale kwanda isibalo sentsha eqashwayo ngenxa yalamathuba.
Kufanele futhi lezi zinhlelo zisize nasekuthuthukiseni amakhono abantu bakuleli ngokuthi izinkampani ezizonikwa imisebenzi ziphoqeleke ukuthi kube khona abantu ezibafundisa amakhono amasha ukuze kuthi noma izinkontileka seziphelile bakwazi ukuziphilisa.