I-Arrows ivivinya umgadli omusha wase-Europe
IFIHLE induku emqubeni ngomgadli wase-Europe iLamontville Golden Arrows esivele isisayinise isitobha saseZimbabwe ngenhloso yokuqinisa iqembu ngaphambi kokuqala kwesizini entsha ka-2018/2019 neMaritzburg United ngo-Agasti 5.
Nakuba ezishaya isifuba ngakwazi ngalo mgadli kodwa uClinton Larsen ubengazimisele ukudalula okuningi ngenduku yakhe ayigawule ezizweni ngaphandle kokuthi unethemba lokuthi kube yilokhu akucabangayo.
“Ngeke ngande kakhulu ngaye kodwa uzofika kusasa (esho izolo ekuseni) bese simhlola izinsuku eziyishumi. Ngemuva kwalokho sizobe sesiyanquma. Imbangela yokungadaluli lutho ngaye ukuthi asifuni ukungena esikhinsini, osekuwele kusona amaqembu amaningi. Abadlali bafika kuleli beze kwelinye iqembu kodwa bazithole sebekwamanye, manje lokhu kuyasifundisa ukuthi singangeni ogibeni olufanayo,” kusho lo mqeqeshi.
ULarsen utshele Isolezwe ukuthi weneme ngakho konke okwenzekayo eqenjini ngaphandle kokulinyalelwa uZolani Nkombelo kanti usanda kudedela uLehlohonolo Nonyane. UNkombelo uphuke eziqeqesha ne-Arrows, uzohlala isikhashana engabonakali ngenxa yalokhu kulimala.
“Isilungile indaba kaNkombelo ngoba sesisivalile isikhala sakhe ngoDevine (Lunga) waseZimbabwe. Ngeke singene sigxile kakhulu emakethe ngoba sizoqhubeka nebesikwenza ngabadlali bethu beMultichoice Diski Challenge. Sisesontweni lesithupha siziqeqesha futhi ngineme ngakho konke. Ngeke vele ngikwazi ukukala ukuthi sikulungele kangakanani ukuqala kwesizini kodwa ngijabule ngengikubona emidlalweni yokuzwana amandla,” kusho uLarsen.
Uqinisekise ukuthi bahambile eqenjini uJabulani Shongwe osekwiChippa United, Kudakwashe Mahachi oye kwi-Orlando Pirates, Thomas Chideu, odedelwe yize ebengathandi lo mqeqeshi, noNonyane ohlale isikhathi eside engadlali ngesizini edlule ngenxa yokulimala. Uzama inhlanhla kwiBidvest Wits uNonyane ngenhloso yokusayina.
ULarsen ephawula ngoLunga, obedlalela iChicken Inn yaseZimbabwe, wayidlala yonke idla isicoco seCosafa Cup muva nje, uthe uzomangaza abaningi. Ngeke nokho abe nesizungu uLunga kuleli qembu yize ehambile uMahachi ngoba bakhona uDanny Phiri noKnox Mutizwa bobabili abazi ukusuka nokuhlala.
Ngesizini edlule uPhiri uhlale isikhathi engadlali ngenxa yokulimala. Kwenzeke into efanayo naku-Andile Fikizolo njengoba sekunguNkombelo manje. Umgadli omusha uzobe engekho kwiPremiers Cup ngempelasonto.