IKaizer Chiefs ihlola abadume ngokungalali
IKAIZER Chiefs, esanda kuphumela obala ngokuthi ayikaqedi ukusayinisa abadlali, ihlola uMzikayise Mashaba ogcine ukubonakala kwiMamelodi Sundowns no-Ayabulela Konqobe osanda kushiya kwiChippa United.
Bobabili laba badlali banomlando omubi wokuba sezindabeni ngendlela engeyinhle abaziphatha ngayo uma bengaphandle kwenkundla.
UMashaba, elingangatshazwa ikhono lakhe, ugcine ukubonakala kwiSundowns ngoMeyi ka-2017 okusho ukuthi sekuphele unyaka engalithinti ibhola. Indawo ayidlalayo isanda kuvuleka ngokungavuselelwa kwezinkontileka zoTsepo Masilela noSibusiso Khumalo, okhonjwa kwi-Ajax Cape Town.
Lo mdlali, obekubuye kuvele izindaba ezingezinhle ngaye ngendlela abeziphatha ngayo ize imxabanise noPitso Mosimane, usekhonjwe emaqenjini amaningi njengoba kuvuleke iwindi lokushintshana ngabadlali okubalwa kuwona iBidvest Wits, Lamontville Golden Arrows neHighlands Park.
Akwethusi ukuthi uMashaba ufunwa amaqembu amaningi kanti uma ezothembisa kuGiovanni Solinas ukuthi uzobayeka abangani ababi (abuye akhale ngokuthi yibona abamphazamisayo) uzoyithola indawo ngoba uwumdlali oseqophelweni.
IChiefs yiqembu elinomthetho futhi abadlali bayo bahlale njalo bekhombisa izimpawu zokuthi bayafundiswa ngokuziphatha ngakho-ke uma uMashaba noKonqobe bezimisele ngokuthola izindawo kuleli qembu kuzofanele basuke ezindabeni ezingezinhle.
UKonqobe, oke wadlala kuMaZulu ne-Ajax, naye izindaba ezingezinhle zihlale zimlandela kangangokuthi kuze kwadingeka ukuba achaze ukuthi usale kanjani endizeni kade Usuthu luyodlala neMbombela United. Kuthiwa lo mdlali usale kule ndiza ngoba ekade ezikhiphile ebusuku wase eqisa kukona konke ayekwenza ngalolo suku.
Eziphendulela kulokhu uKonqobe wathi, yena akayena umuntu omubi kodwa kukhona isimo esingesihle empilweni yakhe ebesimmpintshile. Ungumdlali okahle futhi ikhono lakhe alingatshazwa kwazise nasemaqenjini amancane esizwe usedlale kuwona wonke.
Okungacaci ukuthi uma iChiefs imsayinisa izokhokha yini kwiChippa ngoba usenenkontileka nayo. Yize kunjalo kodwa iChippa isanda kumumemezela njengomdlali ohambile uKonqobe.
Kuthintwa uVina Maphosa weChiefs ngalaba badlali uthe usanda kubuya eholidini ngakhoke abekho abadlali abaziyo ukuthi bayahlolwa.