Abakabanjwa namanje abamabhomu
AKUKABOSHWA muntu ngokutholwa kwamabhomu ezitolo zakwaWoolworths. UBrigadier Hangwani Mulaudzi woKlebe uthe akekho oseboshiwe ngezigameko zokutholakala kwamabhomu nangokusabisa ngokuthi kunamabhomu ezindaweni ezehlukene.
UMulaudzi utshele Isolezwe ukuthi basebenza kanzima ukuphenya izigameko zokutholwa kwamabhomu nezokusabisa ngawo kodwa okwamanje akekho asebembophile.
“Ukhona umsolwa oke waphonswa imibuzo kodwa ubuye wadedelwa ngoba akukho obekumhlanganisa namabhomu atholwe ezindaweni ezihlukene eThekwini. Abantu sithi abaqhubeke nokuya ezitolo abazithandayo ngoba sisebenza kanzima ukuthola isixazululo salolu daba,” kusho uMulaudzi.
Ucele abasabisa ngokuthi kunamabhomu ezindaweni ezehlukene ukuthi bawuyeke lo mkhuba ngoba kuyicala ukuwenza futhi uma bebanjwa bazovalelwa ejele.
Iphephandaba elinguzakwabo weSolezwe, iSunday Tribune libike ukuthi umsolwa uboshwe eshutha izithombe esitolo sakwaWoolworths.
Ababhekele abezindaba kwaWoolworths bathe basebenzisana namaphoyisa ukuqinisekisa ukuphepha kwamakhasimende.
“Asikwazi ukuphawula kabanzi ngalolu daba ngoba sisebenzisana namaphoyisa. Sicela abantu basibekezelele kulesi sikhathi esinzima. Abantu bazoseshwa uma bengena ezitolo zethu futhi siyabachazela ukuthi lokhu sikwenzela ukuphepha kwabo. Siyacela babekezele ngoba ezokuphepha zizoqina kuzo zonke izitolo zethu,” kusho abakwaWoolworths.
Okwamanje izigameko zokutholakala kwamabhomu zisabikwe ezitolo zakwaWoolworths eziseThekwini namaphethelo.
Sekuke kwatholwa ibhomu kwaWoolworths osenxanxatheleni yezitolo iPavilion naseGateway kwathi eBridge City kwasatshiswa ngokuthi likhona kodwa langatholakala, elinye litholwe kuWoolworths osenkabeni yeTheku.
Wonke amabhomu atholwe kulezi zitolo ngaphambi kokuthi aqhume kwazise amaphoyisa ophiko lweziqhumane afike awahlakaze masisha.
Izazi zokuphepha zithe abantu abehlise amaphaphu ngoba yize kusetshenziswa amabhomu afana nalawo asetshenziswa ngabashokobezi kodwa abukho ubufakazi obeseka izinsolo zokuthi iNingizimu Afrika isihlaselwe ngabashokobezi.