Ziya phambili izingxoxo zamaholo
ZIZOQHUBEKA ngoLwesihlanu izingxoxo zamaholo phakathi kwezinyunyana zabasebenzi nabaphathi be-Eskom.
Lezi zindaba zidalulwe nguNobhalala Jikelele weNational Union of Metalworkers of South Africa (Numsa), uMnuz Irvin Jim esitatimendeni esithunyelelwe abezindaba. UJim uthe basamile ekutheni abasebenzi kufanele bathole amabhonasi ngoba basebenze kanzima futhi abangeni ndawo ekutheni le nkampani ayiyenzanga inzuzo. “Sihlangane ne-Eskom ngempelasonto; kuyithina (Numsa), iNationa Union of Mineworkers (NUM) neSolidarity. Sibanikeze isiphakamiso esithemba ukuthi sizoxazulula inkinga yokunyuswa kwamaholo. Akwamukelekile ukuthi abasebenzi basayine isivumelwano sokuthi bazothola amabhonasi uma besebenza ngendlela ethile bese kuthi uma inkampani iba nezinkinga ahoxiswe,” kusho uJim. Uphinde wacela i-Eskom ukuthi ihoxise uhlelo lwabakhiqiza ugesi ngokuzimela olubizwa nge-Independent Power Producers (IPP) ngoba yilona oludla imali yale nkampani.
“Okwamanje i-Eskom izoxhumana neBhodi nabanye abaphathi babo, kuzothi ngo-Agasti 3 babuyele kuthina ngalokho abavumelene ngakho. Siyathemba sizoshesha sisithole isixazululo ngoba asithandi ukudlulisela lolu daba kumxazululi kodwa sizokwenza njalo uma singasitholi isisombululo,” kusho uJim.
UMnuz Livhuwani Mamburu obhekelele ezokuxhumana kwiNUM, ucele i-Eskom ukuthi ikhokhele abasebenzi amabhonasi ngoba basebenze kahle bakwenza konke obekulindeleke kubo.
Ekhuluma nabezindaba uMnuz Khulu Phasiwe, obhekelele ezokuxhumana e-Eskom, uthe izingxoxo nezinyunyana ziyaqhubeka futhi bayajabula ngalokhu.
Uthe okwamanje i-Eskom ibingakabeki lutho oluthitha amabhonasi ngoba ilahlekelwe nguR2.3 billion ngonyaka wezimali ophelile.