Umndeni kwabashone ezingozini zomgwaqo
KUPHENYWA amacala okubulala ngokungenhloso emva kokushona kwabantu abayisithupha ezingozini ezehlukene eThekwini ngempelasonto.
NgoMgqibelo kushone amalungu amane omndeni wakwaKhan engozini eyenzeke ekhoneni lomgwaqo uDr Yusuf Dadoo (Broad Street) no-Anton Lembede (Smith Street) eThekwini.
Ngokwemibiko evezwe abezimo eziphuthumayo bakwaRescue Care, kushayisane izimoto ezimbili enye yalala ngokhakhayi.
Kukholakala ukuthi umndeni ubuphuthuma esibhedlela ukuze kwelashwe indodakazi yawo ebingaphilile kahle.
Ababili abebehamba ngenye imoto basindile bayiswa esibhedlela esiseduzane.
Ngawo uMgqibelo kushone abantu ababili kwalimala oyedwa eMountview ngase-Verulam. Ngokusho kwabeReaction Unit South Africa, bathole ucingo lubazisa ngengozi eyenzeke emgwaqweni u-Amora Drive ngase-Mountview.
Imoto abebehamba ngayo kuthiwa iphaphalazile yabakhiphela ngaphandle yabe isigqamuka amalangabi.
Ngokwesitatimende sabakwa-Reaction Unit bafike endaweni yesigameko abesilisa abathathu sebengaphandle kwemoto ebisha ubuhanguhangu. Ababili bashonele khona lapho kwathi oyedwa waphuthunyiswa esibhedlela sasoSindisweni kukubi.
Kusolwa ukuthi imoto ibihamba ngesivinini esiphezulu ngesikhathi umshayeli ehluleka wukuyilawula. Ingozi iholele ekutheni kuvalwe umgwaqo isikhathi eside abezimo eziphuthumayo nezicima mlilo besasebenza. Abanye abashayeli baphoqelekile ukuthi basebenzise eminye imigwaqo ngesikhathi kusakhucululwa endaweni yengozi.
Kwenye ingozi eyenzeke eMariannhill, itekisi ebithwele abagibeli iphaphalazile emgwaqweni yakhalakatheka emjondolo. Kulimale abantu abayisishiyagalombili kule ngozi.
Okhulumela abezimo eziphuthumayo bakwaER24, uMnuz Russel Meiring, uthe bafice abantu bezulazula eduze kwetekisi.
“Sihlole abagibeli sathola ukuthi bayisishiyagalombili abalimele. Sibaphuthumise esibhedlela ukuze belashwe ngokugcwele,” kusho uMeiring.
Amaphoyisa KwaZulu-Natal ayaphenya ngembangela yazo zonke lezi zingozi, akekho osaboshiwe ngazo.