UKomphela akazisoli ngokuboza kweChiefs
AKAZISOLI namanje ngendlela yokudlala abeyisebenzisa kwiKaizer Chiefs uSteve “Mphathi” Komphela osengumqeqeshi weBloemfontein Celtic. Ngokusho kwalo mqeqeshi, i-4-3-3 abeyisebenzisa kwiZimpofana iyindlela yokudlala efanele ebholeni lesimanje, nathe okufakazela lokho ukudlala ibhola elinenkosi phakathi kweBelgium ne-England kwiNdebe yoMhlaba ebiseRussia.
UKomphela uveze ukuthi uthwale kanzima kwiChiefs iminyaka emithathu ehlaselwa yizintatheli, nabalandeli bebhola kuleli, bemsola ngendlela yakhe yokudlala. Sekungumlando ukuthi uphume ngesamagundane kuleli qembu laseNaturena, esula isigubhukane ngemuva kokushaywa iFree State Stars ngo 2-0 kowamandulela owamanqamu eMoses Mabhida Stadium, eThekwini ngo-Ephreli.
“Ngiyethemba sonke bathandi banobhutshuzwayo sifundile kokwenzeke eRussia kwiNdebe yoMhlaba. Amazwe amabili ayedlala kowandulela owamanqamu okuyiBelgium ne-England bebesebenzisa yona futhi ibasebenzelile. Ngokwami iBelgium bekuyilona eqembu ebelidlala ingcwenga yebhola eRussia, kanti uma ubuka i-England ikhombise ukukhula okukhulu kunalokho ebesiyazela khona kwiNdebe yoMhlaba. Kuyishwa-ke ukuthi izintatheli zazingayizwa indlela yami yokudlala kodwa namhlanje kuyakhombisa ukuthi iyasebenza,” kuchaza uKomphela obebuye asebenzise i-4-5-1 ebigxekwa ngokuthi yandisa kakhulu abadlali basemuva.
Ebuzwa ukuthi ubona ukuthi iyozala nkomoni kule sizini kwi-Absa Premiership njengoba ngempelasonto iqala imidlalo uthe, “Uma ubuka iMamelodi Sundowns kuningi kakhulu okushintshile, ngakolunye uhlangothi ukushintsha kwabaqeqeshi kweChiefs nakho kuzoba nomthelela esizowubona. Ukuvuka kwe-Orlando Pirates eqede isizini ivutha ingabaselwe, konke lokhu kudinga ukuthi ukucabangisise ngoba kujulile. Nokho ngingathi silindele isizini ezoba mnandi kakhulu.”
Ngesikhathi uKomphela esacija iChiefs, uLorenzo Gordinho wabolekiswa kwiCeltic, ekhala ngokuthi ijezi akalitholi. Sebephinde baficana kwiSiwelele, nokho kulokhu kubonakala sengathi uKomphela usecula elinye iculo.
“Uziqeqesha kanye neqembu, futhi uzimisele ngendlela emangalisayo. Ngike ngasebenza naye (uGordinho) benoLucky Baloyi (kwiChiefs), ngakho bayakwazi engikufuna kubona. Engingakusho nje ukuthi akusavumi ngilinde kuqale isizini ngoba amalungiselelo ahamba kahle kakhulu,” uphethe kanje uKomphela.