Usekulungele ukudlala oweKings obegula
UZIZWA ewumqemane umdlali osayiniswe yiReal Kings FC, uPapy Faty, onyamalale ebholeni eminyakeni edlule ngemuva kwemibiko yokuthi unesifo senhliziyo.
UFaty (27) uquleke emdlalweni edlikiza kabi izikhawu zaze zaba zimbili eyibamba kwiBidvest Wits eminyakeni edlule.
Ngemuva kokuhlolwa ngodokotela kuvele ukuthi unesifo senhliziyo kwathiwa ululekwe ngokuthi angabe esalidlala ibhola. Ube eselishiya leli qembu laseGoli ngo-2016 kodwa wagcizelela ukuthi akakazimiseli ngokuwagaxa emgibeni amakhokho.
Ube esevumbuka eqenjini laKwaZulu-Natal (KZN) eliyibamba kwiNational First Division (NFD), iKings, emnikeze inkontileka yeminyaka emibili.
“Ngesikhathi sengibuyele ekhaya mina nomndeni wami siye kodokotela abehlukene abelapha inhliziyo kwatholakala ukuthi angikaze ngibe nalesi sifo. Kutholwe ukuthi inkinga yami ukuba nomfutho ophezulu wegazi (BP) obekudalwa wukucabanga kakhulu. Ngilulekwe ngokuthi ngingacabangi izinto eziningi ngiphumuze umqondo,” kuchaza uFaty.
Uthe ngesikhathi etshelwa ukuthi angabe esalidlala ibhola “kufane nokuphucwa umfazi omthanda kakhulu.
“Kodwa ngokuhamba kwesikhathi ugcine usukwazi ukudlulisa ugxile kwezinye izinto,” kusho uFaty.
Ngokusho kwakhe ngesikhathi ekwelakubo eBurundi ubezigcina esesimeni esihle ngokuziqeqesha yedwa aphinde adlale kweyobungani emaqenjini ayibamba kumaligi aphansi.
Izolo ushaye igoli lokulinganisa ngesikhathi ezakhe zibambana ngo 1-1 naMaZulu FC emdlalweni owandulela owamanqamu weKZN Premier’s Cup eKing Zwelithini Stadium, eMlaza.
IKings ebenawo amathuba okushaya amanye amagoli, igcine iguqe ngo 4-2 sekukhahlelwa amaphenathi.
Lo mdlali, obe nazo izimpawu zokuba wuhlupho, uthe uzizwa engumqemane futhi ukulungele ukuqala kwesizini.
“Anginayo inkinga ngokuthi ngijoyine iqembu elidlala kwiNFD, okubalulekile wukudlala. Okuhle wukuthi iqembu linezifiso zokuthi ligcine esigabeni esikhulu. Ngifuna ukulekelela ekulisizeni kulokho,” kusho uFaty.
Ngesizini edlule iKings kwale kancane ukuthi izibekisele indawo kweyokuhlungela i-Absa Premiership iqeda endaweni yesine kwi-log.