Kuwahambele kahle amaProteas enqoba
AYIQALE kahle imidlalo yosuku olulodwa amaProteas, equmba phansi iSri Lanka ngamawikhethi amahlanu emdlalweni obuseRangiri Dambulla International Stadium izolo.
Lona bekuwumdlalo wokuqala kwemihlanu yosuku olulodwa ezodlalwa yila maqembu.
I-toss iSri Linka iyona eyinqobile, yakhetha ukuthi izobhetha kuqala kwazise inkundla ibizoqina kakhulu uma kuphakama ilanga obekuzokwenza iqembu elizobhetha emini noma ntambama libe nenkinga yokuthola ama-run.
Nokho, lelo qhinga alisebenzanga njengoba osokhaya bekhishwe bonke benze 193, kuma-over awu-34.3. UKusal Perera, owenze u-81 noThisara Perera owenze u-49, yibona abadlale kahle kwiSri Lanka ebibukeka ididekile.
Abashwibi baseNingizimu Afrika, uTabraiz Shamsi noKagiso Rabada, benze umsebenzi oncomekayo njengoba bethole amawikhethi amane umuntu ngamunye.
ULungi Ngidi yena ukwaze ukuthola eyodwa.
Kube sekubhetha amaProteas adlale kahle kakhulu njengoba kuwathathe ama-over awu31 ukufica isikweletu ebesibekwe iSri Lanka.
U-JP Duminy uyena obe yiqhawe njengoba enze ama-run awu-53 engakhishiwe, kanti ukaputeni wamaProteas, uFaf Du Plessis, wenze awu-47 benoQuinton de Cock. “Sidlale kahle kakhulu kwazise konke ebesikuhlelile kwenzeke njengoba besifisa. Okungichaze kakhulu indlela esidlale ngayo sibhekene namaspinner aseSri Lanka. Asizange siwacenge nhlobo kodwa sivele sawahlasela kwaba nokubambisana okuhle singabadlali. Sizolokhu siqhubeke njalo, sifunda emaphutheni esiwenzayo ukuze singeke sisawaphinda ngokuzayo,” kusho uDuminy obese kuyihlandla lika-26 enza ama-run awu-50 nangaphezulu emidlalweni yosuku ololudwa.
Umdlalo wosuku olulodwa wesibili uzoba ngoLwesithathu enkundleni efanayo, eDambulla. AmaProteas abenqoba okokuqala kulolu hambo lwaseSri Lanka njengoba eshaywe kabuhlungu emidlalweni emibili ye-Test aqale ngayo.