Izinsolo ngoxhaso lukaR56m weTheku
SEKUQUBUKE imibuzo ngezindaba esezisabalele ezinkundleni zokuxhumana ezishiye abaningi bethukile, ezithi uMasipala weTheku uxhase umcimbi womculi we-hip hop, uCassper Nyovest ngoR56 million.
Lo mcimbi owaziwa ngeFill Up Moses Mabhida kulindeleke ukuthi ube seThekwini, enkundleni iMoses Mabhida ngoDisemba 1.
Kumangale iningi kuvela lezi zindaba kuFacebook, kukhalwa ngobukhulu bemali ukuthi ingaxhasa umcimbi owodwa vo.
UMsizi Edgar Nkosi nguyena obebuza ukuthi kuyiqiniso yini ukuthi umasipala uxhase lo mcimbi ngoR56 million?
“Ngidinga umuntu ozongitshela ukuthi lawa ngamanga ngoba uma kuyiqiniso ngeke inhlangano elawula lo mkhandlu ilithole elami ivoti ngonyaka ozayo,” kubhala uMsizi.
Uthe akananxa noNyovest kodwa indaba inoR56 million emkhandlwini onezidingo eziningi kangaka.
Abanye bebekhala ngokuthi uma lezi zindaba ziyiqiniso kumele ingavotelwa i-ANC elawula iTheku. UPhillip Sithole oyiPhini leMenenja ophikweni lwezokuThuthukiswa koMnotho nezokuVakasha kuMasipala weTheku, uthe yize sekuqaliwe ukuxoxwa ngalo mcimbi kodwa bebengakasho ukuthi uzoxhaswa ngamalini.
“Ayilona iqiniso le mibiko yokuthi sixhase lo mcimbi ngale mali okukhulunywa ngayo ezinkundleni zokuxhumana. Umuntu okhuluma ngalokho ningambuza ukuthi ukuthathaphi akhuluma ngakho,” kusho uPhillip.
Uthe bengumkhandlu ngeke bakwazi ukuba nemali engako ukuxhasa umcimbi.
Esitatimendeni esikhishwe ihhovisi lezokuVakasha emkhandlwini, bathe: “Imicimbi ingenye yezindlela zokuthuthukisa iTheku. Singumkhandlu sisakhuluma nabahleli bawo kodwa asikafiki esinqumeni sokukhipha imali yokuwuxhasa,” kuchaza lesi sitatimende.
Umholi weDA, KwaZulu-Natal oke waba yikhansela kuMasipala weTheku, uZwakele Mncwango naye uphawulile ezinkundleni zokuxhumana, wathi lezi zindaba ziyiqiniso.
Imenenja ehhovisi lezokuVakasha uSbu Zondi ithe, lezi zindaba bebengakazidluliseli ngisho emkhandlwini ukuthi uzibheke njengoba zisaxoxwa ehhovisini labo kuphela.
“Abantu abahlela lo mcimbi sebefikile kodwa akukho esisavumelane ngakho futhi akukho esisakudlulisele emkhandlwini ukuthi ukubheke, njengoba kuyaye kuthi uma sekuvunyelwene udaba lube seludluliselwa esigungwini esilawula ukusebenza komkhandlu.
Ngaphambi kokuxhasa umcimbi siyaye sibheke ukuthi yini ezozuzisa thina. Nakuwona lona sisenza okufanayo, sisabheka izinto ezahlukene, akukho esesikusayinile,” kuchaza uZondi.
Isolezwe lixhumane nowesilisa ozibize ngoSpike oyimenenja kaCassper Nyovest, othe umuntu ongaphawula ngalolu daba okwamanje usezwen i-United States of America.
Imizamo yokuthola lo mculi ayiphumelelanga, ucingo lwakhe belungangeni.