UNgizwe usolwa ngokushaya umkakhe
UMSAKAZI woKhozi FM, uNgizwe Mchunu, usolwa ngunkosikazi wakhe ongumculi, uFloda, ngokumbhaxa kangangokuba waze wacishe waphuma umphefumulo.
UNqobile “Floda” Mchunu uveze lezi zindaba enkundleni yokuxhumana u-Instagram ngempelasonto. Ubefake ngokohlelo lokuthi kuphinde kunyamalale ngemuva kwamahora angu-24.
UFloda uqale wabhala ukuthi akakweleti muntu, owesilisa nowesifazane, futhi uyabonga. Uqhube wathi: “Kuwo wonke umuntu engimaziyo owangiziba ngikhala ngesikhathi ngishaywa owesilisa ngonyaka odlule, angisoze ngakhohlwa.”
Ethintwa uFloda izolo ucele ukuthunyelelwa umqhafazo. “Angifuni ukukhuluma ngakho, ngiyabonga,” kusho yena ngeSMS. Ekhasini lakhe uqhube wathi wacishe washona.
“Ngiyaxolisa kodwa nonke aniyilutho (esho kwababemziba).” Imibhalo kaFloda ithathe elinye igxathu esemgagula ngegama uNgizwe waze wenza isiqiniseko sokuthi uyakubona akubhalayo ngokumnamathisela embhalweni.
Imizamo yokuthola uNgizwe izolo ayiphumelelanga ngoba ucingo lwakhe belungangeni nokuthe selungena emini wangalubamba ezanywa izikhawu ezehlukene.
UFloda uzakhele ugazi ngezingoma okubalwa kuzo ethi Dicapitate Me, R&B kanti muva nje usanda kukhipha i-video yengoma yakhe ethi What You Do.
Kuvela lezi zinsolo nje, isikhulu semisakazo okukhona kuyo nePower FM, uGiven Mkhari, sisanda kuvulelwa icala lokushaya ngunkosikazi waso u-Ipeleng. Naso samvulela icala unkosikazi kodwa amacala abuye ahoxiswa. Izolo iNkantolo yeMantshi yaseMidrand imkhiphe phambili umculi uCici ecaleni lokushaya ayelivulelwe ngowayeyisoka lakhe, u-Arthur Mafokate. Icala elavulwa nguCici lokushaywa ngu-Arthur lisaqhubeka lizobuyela ngo-Agasti 23.