Limshonele unesi obanjwe nama-AK47 emqashweni
ZIMKHALELE ezama ukubaleka unesi oboshwe nama-AK47 amabili emqashweni oseduze nesibhedlela asebenza kuso eMontebello izolo.
Unesi wesilisa (37) waseMsinga kodwa osebenza esibhedlela saseMontebello kuthiwa uzame ukubaleka ngesikhathi kugasela amaphoyisa ezombopha ngecala lezibhamu.
Endlini yalo nesi kuthiwa bekufihlwe izibhamu ezimbili ama-AK47, zashaqwa amaphoyisa aseNsuze.
Amaphoyisa ezwe ukuthi unesi unezibhamu eziyingozi kakhulu endlini yakhe.
Okhulumela amaphoyisa KwaZulu-Natal uLt. Col Thulani Zwane ukuqinisekisile ukuthi kutholwe izibhamu kwaboshwa nomsolwa.
“Amaphoyisa aseNsuze abophe owesilisa oneminyaka engu-37 ngecala lokutholakala nezibhamu ama-AK47 amabili. Lezi zibhamu zizoyiswa lapho zizohlolwa khona ukuthi azithinteki yini kwamanye amacala. Umsolwa uzovela enkantolo yaKwaMaphumulo kusasa (namhlanje),” kusho uZwane.
Isolezwe lithole ukuthi ukuboshwa kwalo nesi kubathuse bonke abasebenzi basesibhedlela ngoba bebengakulindele. Kuthiwa amaphoyisa agcwale emiqashweni ehlala abasebenza esibhedlela, ekake indlu kamsolwa.
Kuthiwa uzamile ukubaleka kodwa kwanhlanga zimuka nomoya ngoba amaphoyisa abemkake nxazonke.
Kwenzeka lokhu nje ngesonto eledlule kudutshulwe omunye unesi ezongena emsebenzini khona eMontebello.
Ngokusho kwamaphoyisa akekho obesaboshiwe ngokubulawa kwalo nesi. Izibhamu ezitholwe kumsolwa zizobhekwa ukuthi azithinteki yini ecaleni lokubulawa kukazakwabo.
Eminye imithombo engathandanga ukudalulwa iveze ukuthi kunezinsolo zokuthi unesi oboshiwe ubeqashisa ngalezi zibhamu eziyingozi. Amaphoyisa ebuzwa ngalokhu athe akukho angakuphawula ngakho ngoba uphenyo lwawo lusaqhubeka.
I-AK47 yisibhamu esiyingozi kakhulu nesingavumelekile ngokwemithetho yakuleli ukuba siphathwe ngabantu emphakathini. Ngokusho kwamaphoyisa kunenqwaba yemikhankaso nezinhlelo zokukhuculula lezi zibhamu emphakathini.
Okhulumela uMnyango wezeMpilo KwaZulu-Natal, uNksz Ncumisa Mafunda, uthe bayakuqinisekisa ukuthi kukhona umsebenzi wabo oboshiwe kodwa bazodedela amaphoyisa enze umsebenzi wawo.