Bakhala ngofata bengazitholi ezomshado
BAKHALA ngofata okusolwa ukuthi waphambanisa imininingwane yabo eyihambisa eMnyangweni wezaseKhaya, abashadile baseJolivet, osekuphele unyaka bengazitholi izitifiketi zomshado.
UMnuz Mbongeni Hlongwane noNksz Collecta Sigwaza nabanye ababalelwa kwisishiyagalombili, okuthiwa bashadiswa uFata Senzosenkosi Ngidi, obephethe iPherishi yamaRoma, iSt Michaels, iNdonyane, nyakenye kuze kube manje abanazo izitifiketi zomshado, abomnyango bathi amaphepha abo afika sekudlule isikhathi futhi enamaphutha, okwaholela ekutheni kuphenywe.
UHlongwane nowakwakhe basebenza eSawoti, bashada ngoJulayi nyakenye. Abakwazi ukuhlala ndawonye njengoba unkosikazi wakhe oyiphoyisa ehlala endaweni yamaphoyisa angashadile. Akakwazi ukufaka isicelo sendawo yabashadile ngoba ayikho incwadi yomshado.
“Sesifana nabantu abavele bazifakela izindandatho nje. Ngemuva komshado sathi siya eMnyangweni wezaseKhaya eScottburgh kwathiwa umfundisi akakawalethi amafomu ethu, salinda isikhashana sabuye saphindela satshelwa okufanayo,” kuchaza uHlongwane.
Ngemuva kwezinyanga ezintathu uthe batshelwa ukuthi amafomu afikile kodwa kukhona okupheywayo kuwo.
“Sesiphindele lapha izikhawu eziningi sitshelwa into efanayo ukuthi kuyaphenywa. Asazi ukuthi ubani ophenywayo esingaxhumana naye, sithole ngophenyo ukuthi selukusiphi isigaba.” kusho uHlongwane.
Uthe okunye okubaphatha kabi ukuthi uFata Ngidi sewahamba ePherishi.
UNkk Nana Dlamini, uMaNgcobo uthe benomyeni wakhe uMnuz Sikhumbuzo Dlamini bashadiswa uFata Ngidi, ngoMeyi nyakenye.
UNkk Dlamini uthi uze waphoqeleka ukuthi ingane yakhe ayishayele umazisi ngesibongo sakhe ngoba abukho ubufakazi bokuthi ushadile.
“Sesike sazama nokuthi okungenani luhoxiswe uhlelo lokushadiswa umfundisi siziyele ngqo eMnyangweni wezaseKhaya, kwathiwa ngeke kusalunga. Sesibuya nakumbhishobi kwanhlangazimuka nomoya,” kusho uNkk Dlamini.
UMnuz Cyril Mncwabe ophethe uMnyango wezaseKhaya KwaZuluNatal uthe ufata waletha amafomu sekudlule isikhathi, kuwona kukhona izinombolo zomazisi eziphambene. Omunye kulaba ayebashadisile wayeseshonile ngesikhathi elethwa.
“Umyeni owashona, wayengasayinanga kwifomu lomshado, asikwazi thina ukukhipha isitifiketi somuntu owashona. Umfundisi kumele alethe amafomu emshado lingakapheli isonto, eshadisile. Lawa mafomu afika sekudlule izinyanga ezintathu, amanye alethwa ngomunye umfundisi owayezosebenza kuleli bandla. Umfundisi othintekayo simcele ukuthi asivezele ubufakazi bokuthi laba bantu wabashadisa ngalezi zinsuku ezibhalwe phansi. Ngenxa yephutha lakhe sesenze nesiphakamiso sokuthi ephucwe igunya lokushadisa. Yize kunjalo siyazama ukuthi lolu daba oluthinta isigaba esimqoka sempilo siluphothule ngokushesha,” kusho uMncwabe.
UFata Ngidi akatholakalanga ezingcingweni zakhe ezintathu, olunye belungangeni, ezimbili zikhale zangabanjwa.
UMbhishobhi Mlungisi Dlungwana wepherishi uthe: “Sizohlangana ngesonto elizayo, siludingide sibone ukuthi singaluxazulula kanjani. Engingakusho nje ukuthi unayo imvume yokushadisa,” kusho uDlungwane.