Bafe olwembiza kusha imithi emakethe
BEBEHLUNGA imithi engashile emlotheni abadayisi bemithi basemakethe yaseThekwini, eseduze kweBerea Station, abafike isitoko sabo sesishe sangqongqa izolo ngemuva kokuthi kuqubuke umlilo ngeSonto ebusuku kule ndawo.
Isolezwe lithole ukuthi abadayisi abangaphezu kuka60 bashelwe yizitolo zabo ezisemakethe yemithi ngenxa yomlilo obusha ubuhanguhangu ngeSonto ebusuku.
Izolo, uNkk Lindiwe Ngcobo (44), utshele Isolezwe ukuthi sekuphele iminyaka engu-20 edayisa imithi emakethe kodwa kuyaqala ngqa ukuthi kube nomlilo oshisa yonke impahla yabo.
“Asazi sizothathani siyihlanganise nani ngoba imithi siyayithenga bese izinyanga nezangoma ziyithenga kithina. Ngishelwe yisitoko senyanga yonke, angazi ngizowakhokhela ngani amakhosikazi aKwaMhlabuyalingana engithenga kuwo imithi. Sizama ukucosha imithi engashile kuyimanje, siyihlunga emalahleni asazi sizokwenze njani,” kusho uNkk Ngcobo.
Uthe abakwaMasipala weTheku bathe bazophenya ngembangela yomlilo ngoba abazi ukuthi uqubukephi njengoba abadayisi befike sekusha.
Abanye abadayisi bathe basuka eMkhomazi befuna ukuzobona lo monakalo, abanye bebezibhongqa phansi bengafuni nokukhuluma nezintatheli.
Imakethe yemithi iyavalwa njalo ebusuku, iphinde ibe nonogada abayiqaphayo.
UMnuz Nkulumo Dube wezicishamlilo eThekwini, uthe bafike emakethe yemithi ngabo-10 ebusuku bacisha umlilo ngamaloli amathathu nezicishamlilo ezingu-15.
Uthe akekho umuntu olimele kulo mlilo kanti ngamaphoyisa azophenya ngembangela yomlilo.
UMnuz Mandla Nsele, oyiPhini leNhloko yezokuXhumana kuMasipala weTheku, uthe uphiko lwabahlola indawo yezigameko emaphoyiseni luzophenya ngembangela yomlilo futhi bazokhipha umbiko ophelele ngokuthi mngakanani umonakalo uma sebethole imiphumela yophenyo.
“Uma abaphenyi bethi ayivalwe imakethe ngesikhathi besaphenya sizokwenza njalo. Okwamanje sizonika abadayisi indawo yokuhweba yesikhashana,” kusho uNsele.
ULt Colonel Zwane wamaphoyisa KwaZulu-Natal, uthe bawutholile umbiko ngomlilo emakethe yemithi kodwa akekho ovule icala ngalesi sigameko.