Indida ngesalukazi esizilengisile
USALE udidekile umndeni wesalukazi esineminyaka engu-81 esitholwe sizilengisile ethoyilethi emzini waso eMondlo.
UNkk Philile Mdletshe utholwe umakoti wakwakhe ezilengise ngentambo yokutheza ethoyilethi ngeSonto emini kodwa okuxaka umndeni wukuthi akabikanga lutho obelumphethe kabi.
Kuthiwa waphuma sengathi uya endlini encane wangabe esabuya.
Umakoti kuthiwa uthuke ezithela phezu kukanina eselenga endlini encane kungekho nencwadi ayibhalile ngokuthi kungani ezilengisile.
Okhulumela amaphoyisa KwaZulu-Natal, uLt Col Thulani Zwane, uthe kuvulwe idokodo ngokushona komuntu.
“Amaphoyisa aseMondlo avule icala kulandela ukuzilengisa kowesifazane osemdala ethoyilethi lakwakhe. Imbangela yalokhu ayaziwa,” kusho uZwane.
Amadodana kamufi, oMnuz Siphesakhe noSandile Mdletshe bathe bashaqekile ngokwenzekile.
“Sididekile ngempela ngokuthi kwenzekeni njengoba umama ekhethe ukuba azilengise. Bengingekho ekhaya, ngithole ucingo nje selungazisa ngokwenzekile. Umama ubesemdala, bengingalindele ukuthi kungenzeka lokhu. Ubehlala ngokugula lokhu kwabantu abadala, ephathwa amadolo nokunye nje kodwa akukho obekungenza sisole ukuthi angazibulala,” kusho uSandile.
Lo mndeni uthe ngelanga lesigameko umufi wavuka ngo10 ekuseni, wadla. Kukhona umakhelwane ayehlezi naye endlini bezixoxela. Uthe esehamba, umufi waphuma engumuntu oya endlini encane.
Ngokusho komndeni izintambo zakhe zokutheza bezihlala endlini yakhe. Kusolwa ukuthi intambo ayisebenzisile ngenye yezintambo atheza ngazo.
Umufi kuthiwa akayena umuntu obejwayele ukukhononda kodwa ubevame ukugula adlikize abuye asinde.
Umndeni uphinde waveza nokuthi umufi ubevame ukuthi uzozibulala kodwa angabiki isizathu. Bathe lokho bebengakunaki ngoba bebethi ukhulunyiswa wukuguga.