Uphenyo ngokhandwe ngamatshe wafa kuthiwa udlwengulile
AMAPHOYISA asaphenya ngokubulawa kwendoda okuthiwa yashaywa ngumphakathi yaze yafa ngoba isolwa ngokudlwengula ibulale umshana wayo yamphosa eweni eDraaihoek, eMpungamhlophe.
Kuthiwa umufi oneminyaka engu-43 ubulawe ngesonto eledlule.
Okhulumela amaphoyisa KwaZulu-Natal, uColonel Thembeka Mbele, uthe amaphoyisa asebenza kanzima ukuze kuboshwe ababulale le ndoda.
“Kube nesigameko sokubulawa kwentombazane eneminyaka engu-16 okusolwa ukuthi idlwenguliwe isidumbu sayo saphoswa eweni. Isidumbu sale ntombazane sitholwe ngoJulayi 15. Kube sekulandela isigameko sowesilisa oshaywe ngamatshe waze wafa. Lona wesilisa kusolwa ukuthi ushaywe ngumphakathi kanti amaphoyisa amatasa nophenyo lokubulawa lwakhe kodwa akekho osaboshiwe,” kusho uColonel Mbele.
Isolezwe lithole ukuthi lo mlisa obulewe ungowakwaSibiya kuthi intombazane izalwe ngudadewabo.
Abesifazane be-IFP baseZululand bahambele emndenini wakwaSibiya beyokhuza umhlola.
USihlalo we-IFP Women’s Brigade eZululand, uNksz Nonkululeko Ndlela, uthe sebeyasola ukuthi kukhona nokusetshenziswa kwezidakamizwa ngalesi sihluku sokudlwengulwa kubulawe izingane zamantombazane.
Uthe usizi abalufice kwaSibiya lubaphule umoya ngoba sekulele izidumbu ezimbili zabantu abazalanayo.
“Sisola izidakamizwa ukuthi yizo ezinomthelela kuyona yonke le nto. Ngikhuluma nje kade siye enkantolo kuvela uMnuz Njabulo Khoza naye osolwa ngokubulala intombazane yakwaZwane ebifunda uGrade 11 KwaNongoma. Leyo ngane nayo yadlwengulwa yalengiswa esihlahleni,” kusho uNksz Ndlela.
Esinye isigameko esishaqise abantu baseZululand esokudlwengulwa kwentombazane maqede yahlohlwa induku ebuntwini bayo.
Imizamo yokuthola umndeni wakwaSibiya igcine ingaphumelelanga.