Umyalelo kaPandor kwabeNSFAS
UNGQONGQOSHE weMfundo ePhakeme useyalele abesikhwama esiboleka izitshudeni imali yokufunda, iNational Student Financial Aid Scheme (NSFAS), ukuthi bangaqhubeki nokwamukela izicelo zezitshudeni ezifuna ukuxhaswa ngemali ngonyaka ozayo.
Encwadini ebhalwe nguNkk Naledi Pandor, ayibhalele uSihlalo webhodi lakwaNSFAS, uMnuz Sizwe Nxasana, eputshukele kwabezindaba, uthe ukhathazekile ngendlela isikhwama esihlela ngayo izinhlelo zokuxhasa izitshudeni, okubalwa kuzo ukuphuza kwaso ukuphasisa izicelo nokuphuza ukukhokhela izitshudeni eziphasisiwe.
Kule ncwadi ukhala ngokuthi lesi sikhungo kubonakala sengathi asikwazi ukulawula izigidi zemali okumele sixhase ngayo izitshudeni.
Lesi sikhwama bekumele sivule ithuba lokufakwa kwezicelo zika-2019 kusasa. Kule ncwadi uthe kunenqwaba yezitshudeni ezingakakhokhelwa imali yokufunda kwalo nyaka.
Okunye okuvelayo wukuthi ubuchwepheshe obusetshenziswa yisikhwama ezikhungweni zemfundo ezehlukene abusebenzi kahle, okuholela ekutheni ulwazi lwezitshudeni olufakwa kubo lube nezinkinga.
Kuvele ukuthi uNkk Pandor uke wabhalela ibhodi lesikhwama phambilini ethi akulungiswe izinkinga ezikhona mayelana nokukhokhelwa kwezitshudeni imali yokufunda.
Waphakamisa ukuthi isikhungo masiqhamuke nendlela yokuxhumana yezobuchwepheshe esebenza kahle exhumanisa izicelo ezifakwa ezikhungweni zemfundo ephakeme nehhovisi elikhulu lalesi sikhwama.
Okhulumela iNSFAS, uMnuz Kagisho Mamabolo, uthe ibhodi lesikhwama nabaphathi baso basebenzisana nomnyango namathimba abo asebenza ezikhungweni ukulungisa izinkinga ezikhona.
Uthe zilinganiselwa ku-20 000 izicelo zika-2018 ezingakaphothulwa okusamele ukuthi lesi sikhwama sithathe isinqumo sokuthi ngabe izitshudeni ezifake izicelo zizohlomula yini esikhwameni.
“Uma iNSFAS inikeza izitshudeni imali engekho amaphepha adingekayo, kuzoholela ekutheni ibukeke njengabantu abangawenzi kahle umsebenzi wabo. Uhlelo lwaonline seluyakuvumela ukuthi izitshudeni zifake amaphepha azo adingekayo zisebenzisa lolu hlelo.
UMnuz Zola Saphetha, unobhala weNehawu, uthe izinkinga zakwaNSFAS zidalwa wukuthi lesi sikhungo sisebenza sengathi siyispaza, kuqashwa izihlobo.
UNkk Pandor uthe kunzima ukuthi asivikele lesi sikhwama ekuhlaselweni wumphakathi nezitshudeni ngenxa yokuthi kusenezitshudeniezingakazi ukuthi ngabe zizohlomula yini kusona ebezifake izicelo zokuhlomula kulo nyaka.