Iziyalo emadodeni abese-ECC
UKUNGAKHALI kwamadoda kunomthelela ekutheni abe nodlame agcine esehlukumeza abantu abathandana nawo.
Lokhu kuvele esithangamini sabantu besilisa ebesihlelwe wuKhozi FM Men’s Forum, ebesiseThekwini Community Church (ECC), izolo.
UNgqongqoshe woMnyango wezeMpilo KwaZulu-Natal, uDkt Sibongiseni Dhlomo, obekwabebekhuluma kulesi sithangami, unxuse abantu besilisa ukuthi babe nonembeza novalo.
“Amadoda kumele avuse unembeza avuse novalo, kufanele asokwe nasengqondweni angagcini ngokusokwa isitho sangasese,” kusho uDhlomo.
Ugqugquzele amadoda wathi makazihloniphe ahloniphe nabantu abathandana nawo. Uqhube wathi omakoti bayahlala emizini abahlukunyezwa kuyona kodwa lawo madoda alindele ukuthi ahlonishwe abesifazane yize ebahlukumeza.
Esinye sezikhulumi kulesi sithangami, uMfundisi Muziwezigwili Nxumalo, ugqugquzele amadoda wathi mawakhale uma enezinkinga.
“Amadoda awafuni ukukhala, kumele afunde ukuba nendawo ekhethekile lapho ezokwazi khona ukukhala. Isisho esithi indoda ayikhali asisebenzi ngoba ukwazi ukubhekana kahle nezingqinamba uma usukhalile,” kusho yena.
UMnuz Thulani Mthalane weKwaZulu-Natal Men’s Forum uveze ukuthi imiphakathi ayinabo obaba ngoba abekho empilweni yezingane.
“Sikhula singenabo obaba ngoba obaba bayayishiya imizi yabo nezingane zabo, obaba sibabheka kubangani noma kwithelevishini lapho esigcina sesifunda khona imikhuba engalungile.”
Uxwayise abantu besilisa abangabhekani nezinkinga zabo ukuthi uma bengabhekani nenkinga abanayo ngaleso sikhathi, inkinga igcina isibuyile ngelinye ilanga ibuye ngendlela enodlame, ezodala ukuthi bagcine sebenza izinto abazozisola ngazo ebezingagwemeka ukube babhekana nezinkinga zisaqala.
Kulesi sithangami kuphinde kwakhuzwa isihlava sokuhlukunyezwa kwezingane nabesifazane ngokocansi.
Phakathi kwabebehambele isithangami bekukhona nomphathi wakwaSABC eKZN, uBonga Mpanza nomsakazi woKhozi uSbu Buthelezi obephethe uhlelo.