Ushaya amakhala umndeni wephoyisa okuthiwa lizibulele
UFUNA kuphenyisiswe umndeni wephoyisa laseBabanango okuthiwa lizidubulile kulandela ukushayisa izinkomo ezintathu ngemoto yomsebenzi, ngoMgqibelo ekuseni.
UConstable Ayanda “Khayo” Gwala (32) wasoLundi, kuthiwa ubesemsebenzini ngesikhathi eshayisa izinkomo ezintathu, iveni abehamba ngayo yalimala kabi.
Kuthiwa ube esema eceleni komgwaqo wazidubula emlonyeni, washonela endaweni yesigameko.
Izolo, Isolezwe likhulume nonina uNkk Bonisiwe Gwala othe abagculisekile ngokuthi uzibulele nangendlela udaba oluphathwe ngayo ngamaphoyisa.
“Okubuhlungu kakhulu wukuthi lesi sigameko senzeke emuva kokuba amaphoyisa aseMahlabathini ethathe imoto eshayisekile ashiya ingane yami yodwa esigangeni iphethe isibhamu somsebenzi. Sifuna kuphenyisiswe kuhlolwe nesidumbu sakhe ngenxa yendlela ashone ngayo. Kuyasimangaza ukuthi aficwe endaweni yesigameko isibhamu esasibhekise kuyena ekubeni kuthiwa uzibulele. Angineme neze ngokwenzekile. Sizolinda ukuhlolwa kwesidumbu,” kusho uNkk Gwala.
Ngokusho komndeni kuyawumangaza nokuthi ungashiya kanjani umuntu esigangeni ekade esengozini yemoto angaphuthunyiswa nasesibhedlela.
“Okungiphatha kabi wukuthi ingane yami isale idindilizile eceleni komgwaqo wonke umuntu eyibuka. Nalo muntu okuthiwa ungumngani wayo obeshiywe nayo ngesikhathi kuthathwa imoto eyishayisile, asimazi, akakaze afike nalapha ekhaya azochaza ukuthi kwenzekeni,” kusho uNkk Gwala.
Ngokusho kukanina kamufi, usuke emsebenzini eya eNgome eyothatha unina wezingane nezingane zakhe ezine. Okunye okuvezwe wumndeni kamufi wukuthi ubethwele kanzima emsebenzini enezinkinga ikakhulukazi nomphathi wakhe.
Umufi uqashwe embuthweni wamaphoyisa ngo-2010, ngo- 2016 ube eseyosebenza esiteshini saseBabanango.
Ngokusho komndeni ngo-2017 umufi uke wazama ukushiya kulesi siteshi ngenxa yengcindezi emsebenzini.
“Indodana yami ngiyayazi, ibingumuntu odinwa manje kodwa isheshe ixole. Kuyasimangaza lokhu okuthiwa ukwenzile. Akukho nokuthi untshontshe imoto ngoba ubesemsebenzini, iphutha lakhe wukuthi ubesendaweni engavumelekile ukuba ahambe kuyo ngemoto yomsebenzi,” kusho uNkk Gwala.
Uphenyo lwamaphoyisa ngalesi sigameko luyaqhubeka. Umufi uzofihlwa kubo oLundi ngoMgqibelo.